28.04.2026 | 22:40
ՏԿԵ նախարարն ու ՎԶԵԲ պատվիրակությունը քննարկել են «Հյուսիս-հարավ», ջրային և տրանսպորտի ոլորտներում ծրագրերը
ՀԾԿՀ-ն երկարացրել է ՀԷՑ-ի նկատմամբ հարուցված վարչական վարույթի ժամկետը
Հասարակություն
14.10.2025 | 14:44
Հայաստանի հանրային ծառայությունները կարգավորող հանձնաժողովը (ՀԾԿՀ) որոշում է կայացրել մեկ ամսով երկարացնել «Հայաստանի էլեկտրական ցանցեր» ՓԲԸ-ի նկատմամբ հարուցված վարչական վարույթի ժամկետը․ այս մասին նշված է հանձնաժողովի հոկտեմբերի 10-ի որոշման մեջ, վարչական վարույթը հարուցվել է 2025 թվականի հուլիսի 18-ին՝ ուսումնասիրելու էներգետիկայի ոլորտի օրենսդրությամբ սահմանված պահանջների հնարավոր խախտման փաստերը։
Հանձնաժողովը արձանագրել է, որ վարույթի շրջանակում ընկերության ժամանակավոր կառավարիչը ներկայացրել է լրացուցիչ և ծավալուն նյութեր, որոնց ուսումնասիրությունը պահանջում է հավելյալ ժամանակ՝ ապահովելու համար փաստական հանգամանքների բազմակողմանի, լրիվ և օբյեկտիվ քննարկումը։ Այդ իսկ պատճառով ՀԾԿՀ-ն որոշել է մեկ ամսով երկարացնել վարչական վարույթի ժամկետը, որը վերաբերում է նաև «Տաշիր Կապիտալ» ՓԲԸ-ին և «Լիորմանդ Հոլդինգս Լիմիթեդ» ընկերությանը՝ ներգրավված որպես վարույթի երրորդ կողմեր։
Հանձնաժողովը վերահաստատել է, որ նպատակ ունի ամբողջությամբ բացահայտել գործի բոլոր հանգամանքները և ապահովել վարույթի մասնակիցների լսված լինելու իրավունքի իրականացումը։
Որոշումը ստորագրել է ՀԾԿՀ նախագահ Մեսրոպ Մեսրոպյանը։
Հիշեցնենք, որ Factor.am-ն այս առնչությամբ զրուցել էր Հանրային ծառայությունները կարգավորող հանձնաժողովի նախագահ Մեսրոպ Մեսրոպյանի հետ, որը նշել էր․ « ՀԷՑ-ի վարույթը կարող է ունենալ երկու ելք։ Գնալու ենք մինչև վերջ երկու հնարավոր սցենարներից մեկով»։
