ՀԷՑ-ի վարույթը կարող է ունենալ երկու ելք. ՀԾԿՀ նախագահ. ՏԵՍԱՆՅՈՒԹ

«Հայաստանի Էլեկտրական ցանցեր» ընկերության վերաբերյալ հարուցված վարույթի վերջնաժամկետը նոյեմբերի 18-ն է։ Այս մասին Factor TV-ին տված հարցազրույցում նշեց Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը։

«Գնալու ենք մինչև վերջ երկու հնարավոր սցենարներից մեկով»,- «Քաղաքացիական պայմանագիր» կուսակցության 7-րդ համաժողովից հետո ճեպազրույցի ժամանակ հայտարարել էր Նիկոլ Փաշինյանը:

Փաշինյանի ներկայացրած առաջին սցենարը նախատեսում է ՀԷՑ-ի ամբողջական ազգայնացում և դրա հանձնումը պրոֆեսիոնալ և հուսալի կառավարման՝ ամբողջությամբ մնալով պետական սեփականություն։ Երկրորդ սցենարի համաձայն՝ ընկերության բաժնետոմսերի մեծ մասը կարող է փոխանցվել էներգետիկ ոլորտի միջազգային հեղինակավոր կառավարչի։ Վարչապետի խոսքով՝ այս տարբերակով կառավարությունը կգնա միայն այն պարագայում, եթե պարզվի, որ առաջին սցենարի իրականացումը պետական բյուջեի համար անհամաչափ մեծ ծախսեր է պահանջում։

Մեսրոպ Մեսրոպյանից հետաքրքրվեցինք՝ քանի որ դեռ վարույթն ավարտված չէ, ինչպե՞ս է Նիկոլ Փաշինյանը արդեն լուծումների մասին հայտարարում։

«Ես հարգանքով եմ մոտենում մեր երկրի ղեկավարի հայտարությանը, ինքը քաղաքական գործիչ է, քաղաքական հայտարարություն է արել, իսկ մենք մեր գործն ենք անում։ Մենք վարույթը կտանենք մինչև վերջ, կպարզվի այն, ինչը կպարզվի»,- ասաց նա։

Մեսրոպ Մեսրոպյանը չի կարծում, որ Նիկոլ Փաշինյանի այդ հայտարարությունն ուղղորդում է հանձնաժողովին։

«Ո՛չ, չուղղորդեց։ Ո՞ւմ ուղղորդեց։ Հանձնաժողովի նախագահը պարտադրված չէ քաղաքական հայտարարությունների ազդեցության տակ որոշումներ կայացնել։ Հանձնաժողովը պարտավոր է մանրամասն ուսումնասիրել վարույթը, հասկանալ՝ ի՞նչ է կատարվում, հայտնաբերված հնարավոր խախտումներն արձանագրել և որոշումներ կայացնել»,- ասաց նա։

Հանձնաժողովի նախագահից հետաքրքրվեցինք  նաև՝ բացառո՞ւմ է, որ կգնան այնպիսի ճանապարհով, որի արդյունքում Փաշինյանի ներկայացրած սցենարներն իրականություն կդառնան։

«Նիկոլ Փաշինյանի սցենարները ես չեմ քննարկում, ես քննարկում եմ վարույթի հնարավոր ելքերը։ Վարույթի հնարավոր ելքերը երկուսն են․ կա՛մ վարույթի արդյունքում՝ ամփոփելուց հետո, կոլեգիալ մարմինը պետք է քվեարկի ու լիցենզիայից զրկի, կա՛մ լիցենզիայից զրկելու հիմքերի բացակայության պարագայում՝ վարույթը կարճվի»,- նշեց նա։

Հարցազրույցն ամբողջությամբ՝ տեսանյութում։

Նարեկ Կիրակոսյան