Փաշազադեն Սպիտակ տանը հանդիպումների ընթացքում ԱՄՆ-ին կոչ է արել Ադրբեջանը հանել կրոնական ազատության հետ կապված խնդիրներ ունեցող երկրների ցանկից

Կովկասի մահմեդականների վարչության նախագահ, շեյխ ուլ-իսլամ Ալլահշուքյուր Փաշազադեն կոչ է արել Միացյալ Նահանգներին հանել Ադրբեջանին հատուկ դիտարկման տակ գտնվող երկրների ցանկից՝ կրոնական ազատության պատճառով։ Ադրբեջանական լրատվամիջոցների հաղորդմամբ՝ Փաշազադեն նման կոչով հանդես է եկել Սպիտակ տանը ԱՄՆ փոխնախագահի ազգային անվտանգության հարցերով խորհրդականներ Էնդրյու Լումիսի և Մայքլ Իմբրեդայի, ինչպես նաև Պետքարտուղարության քաղաքականության պլանավորման բաժնի աշխատակից Ջոնաթան Ասքոնասի հետ հանդիպման ժամանակ։

Նա Սպիտակ տան ներկայացուցիչներին ասել է, որ Ադրբեջանի ներառումը հատուկ հսկողության ցուցակում, իբր, բացարձակապես չի համապատասխանում երկրում տիրող բազմամշակութային միջավայրին և միջկրոնական ներդաշնակությանը։

Փաշազադեն կրկին մեղադրանքներ է հնչեցրել հայկական կողմի հասցեին՝ ասելով, թե Հայ եկեղեցու և հայկական սփյուռքի ղեկավարությունը, իբր, փորձում են խոչընդոտել խաղաղության գործընթացին՝ ընդունելով ապակառուցողական դիրքորոշում և կոչ անելով նոր առճակատման ու ռևանշիզմի:

Հավելենք, որ 2023 թվականի ԱՄՆ Պետքարտուղարության հրապարակած զեկույցում Ադրբեջանը ներառվել էր հատուկ ցանկում՝ որպես կրոնական ազատությունը լրջորեն ոտնահարող երկիր, այդ թվում՝ Արցախի նկատմամբ վերահսկողություն հաստատելուց հետո կրոնական ազատության լուրջ խախտումներում ներգրավված լինելու համար։ Պետքարտուղարությունն այս որոշումը կայացելիս հետևել է Կրոնական ազատության հարցերով ԱՄՆ հանձնաժողովի՝ USCIRF-ի առաջարկությանը, որը մտահոգություն էր հայտնել Լեռնային Ղարաբաղում քրիստոնեական վայրերի ճակատագրի հետ կապված՝ սեպտեմբերին ԼՂ-ն Ադրբեջանի վերահսկողությանն անցնելուց հետո, ինչի հետևանքով Արցախի հայերը բռնի տեղահանվել են։

USCIRF-ը նաև մտահոգություն էր հայտնել կրոնական ակտիվիստների նկատմամբ բռնաճնշումների վերաբերյալ: Իրավապաշտպաններն ահազանգում են Ադրբեջանում կրոնական ակտիվիստների նկատմամբ իրավունքների խախտումների մասին։

Թարգմանությունը՝ Էմմա Չոբանյանի