12.01.2026 | 09:49
Թրամփը՝ «Վենեսուելայի նախագահի պաշտոնակատար»․ ԱՄՆ նախագահը truthsocial-ում լուսանկար է հրապարակել
ՌԴ-ն հարվածել է Ուկրաինայի էներգետիկ համակարգին՝ կիրառելով 118 անօդաչու սարք և մեկ հրթիռ
Քաղաքականություն
12.10.2025 | 16:13
Ռուսական բանակը հոկտեմբերի 12-ի գիշերը հարձակվել է Ուկրաինայի վրա՝ կիրառելով 118 անօդաչու թռչող սարք և X-31 հրթիռ, հաղորդում են Ուկրաինայի ԶՈւ օդային ուժերը։ Ուկրաինական հակաօդային պաշտպանությունը խոցել է 103 անօդաչու։
Օդեսայի մարզում անօդաչուները հարվածել են էներգետիկ ենթակառուցվածքի օբյեկտի, գազամատակարարման կայանի և շրջանային վարչական շենքի վրա, հայտնել է մարզային վարչակազմի ղեկավար Օլեգ Կիպերը։ Վնասվել է մեկ կին՝ ծնված 1991թ․-ին, որը տարբեր աստիճանի վնասվածքներով տեղափոխվել է հիվանդանոց։
Օդեսայի մարզի հարավում՝ Բելգորոդ-Դնեստրովսկ քաղաքում, վնասվել են շրջանի կենսական ենթակառուցվածքի օբյեկտներ, հաղորդել է քաղաքային խորհուրդը։ Արդյունքում՝ քաղաքի մի շարք շրջաններում ժամանակավորապես անջատվել են էլեկտրամատակարարումն ու ջրամատակարարումը։
Ռուսական հարձակումների հետևանքով էլեկտրաէներգիայից զրկվել է Դոնեցկի մարզի չօկուպացված մասը, հայտնել է մարզային ռազմական վարչակազմի ղեկավար Վադիմ Ֆիլաշկինը։
«Մասնագետներն արդեն սկսել են վերանորոգման աշխատանքները և անում են ամեն ինչ, որպեսզի հնարավորինս արագ վերականգնեն էլեկտրամատակարարումը։ Սակայն վնասի վերջնական ծավալներն ու վերականգնման ժամկետները դեռ ճշտվում են»,-գրել է նա։
Ուկրաինայի էներգետիկ նախարարությունը հաստատել է, որ հոկտեմբերի 12-ի գիշերը հարձակման են ենթարկվել երկրի էներգետիկ և գազատրանսպորտային ենթակառուցվածքները․ «Վնասվել են Դոնեցկի, Օդեսայի և Չեռնիգովի մարզերի էներգետիկ օբյեկտները»։
Բացի այդ, տեղական իշխանությունները հայտնել են, որ նախորդ օրը Ռուսաստանի հարձակումների հետևանքով Դոնեցկի մարզում զոհվել է չորս մարդ, իսկ Խերսոնի մարզում՝ երկուսը։ Խերսոնի մարզում, երկու զոհերից բացի, ևս հինգ մարդ է վիրավորվել։ Գնդակոծությունների հետևանքով վնասվել են 13 բազմաբնակարան և 4 առանձնատներ, գազաբաշխիչ կայան, խանութներ, պահեստ և մասնավոր ավտոմեքենաներ, հայտնել է Խերսոնի ռազմական վարչակազմը։
