11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Տաջիկստանը չի կատարել Պուտինի կալանավորման միջազգային քրեական դատարանի օրդերը․ ԵՄ
Քաղաքականություն
10.10.2025 | 19:14
Ռուսաստանի նախագահը Տաջիկստանում է՝ չնայած Միջազգային քրեական դատարանի կողմից տրված կալանման օրդերին։ Տաջիկստանը, որպես Միջազգային քրեական դատարանի Հռոմի կանոնադրության մասնակից պետություն, չի կատարել կանոնադրությամբ ստանձնած իր պարտավորությունները կալանքի օրդերը կատարելու վերաբերյալ։ Այս մասին ասվում է ԵՄ արտաքին ծառայության պաշտոնական ներկայացուցիչ Անիտա Հիփերի հայտարարության մեջ, փոխանցում է BBC-ի ռուսական ծառայությունը։
«ԵՄ-ն իր վճռական աջակցությունն է հայտնում Ռուսաստանի ագրեսիվ պատերազմի ընթացքում կատարված բոլոր հանցագործությունների, մարդու իրավունքների խախտումների և չարաշահումների համար միջազգային իրավունքի համաձայն պատասխանատվության ապահովման, ինչպես նաև տուժածների արդարադատության, փոխհատուցման և չկրկնվելու երաշխիքների իրավունքի ապահովման ջանքերին: Այս առումով ԵՄ-ն շարունակում է աջակցել Միջազգային քրեական դատարանի դատախազի կողմից Ուկրաինայում անցկացվող հետաքննություններին և կոչ է անում բոլոր պետություններին համագործակցել»,- ասվում է հայտարարության մեջ:
Հավելենք, որ 2023 թվականի մարտի 17-ին Միջազգային քրեական դատարանը Ռուսաստանի նախագահ Վլադիմիր Պուտինի և երեխաների իրավունքների հանձնակատար Մարիա Լվովա-Բելովայի կալանքի օրդեր է տվել։ Նրանք մեղադրվում են ուկրաինացի երեխաների արտաքսման մեջ։
Պուտինը Դուշանբե է ժամանել հոկտեմբերի 8-ին։ Սա 2022 թվականից ի վեր նրա առաջին այցն է Տաջիկստան։
Թարգմանությունը՝ Էմմա Չոբանյանի
