Իսրայելն ու ՀԱՄԱՍ-ը համաձայնել են Գազայում կարգավորման ամերիկյան ծրագրի առաջին փուլին

Իսրայելը և ՀԱՄԱՍ-ը  համաձայնեցրել են  ամերիկյան խաղաղության ծրագրի առաջին փուլը։ Այս մասին  հայտնել  է ԱՄՆ նախագահ Դոնալդ Թրամփը Truth Social սոցիալական ցանցում, փոխանցում է DW-ի ռուսական ծառայությունը։

«Սա նշանակում է, որ ԲՈԼՈՐ պատանդները հնարավորինս շուտ կազատվեն, և Իսրայելը իր ուժերը կհեռացնի համաձայնեցված գծեր, որպես առաջին քայլ դեպի երկարատև, կայուն և մշտական ​​խաղաղություն։ Բոլոր կողմերի հետ արդարացի կվարվեն»,- ասվում էր նրա գրառման մեջ։

Թրամփը շնորհակալություն է հայտնել Կատարի, Եգիպտոսի և Թուրքիայի միջնորդներին, որոնք աշխատել են Միացյալ Նահանգների հետ՝ «այս պատմական և աննախադեպ իրադարձությունը իրականացնելու համար»։

Fox News-ին տված հարցազրույցում Թրամփը հայտարարել է, որ Գազայի հատվածում ՀԱՄԱՍ-ի ահաբեկիչների կողմից պահվող պատանդները կարող են վերադառնալ Իսրայել երկուշաբթի՝ հոկտեմբերի 13-ին։ Խոսքը նաև գերության մեջ մահացած պատանդների մարմինների փոխանցման մասին է։

Իսրայելի վարչապետ Բենիամին Նեթանյահուն X սոցիալական ցանցում գրառման մեջ նշել է, որ հոկտեմբերի 9-ին կհրավիրի կառավարության նիստ՝ համաձայնագիրը վավերացնելու և ահաբեկիչների կողմից պահվող պատանդներին վերադարձնելու համար: Reuters-ը հաղորդել է, որ ՀԱՄԱՍ-ը նույնպես հաստատել է Իսրայելի հետ համաձայնագիրը: Ավելի ուշ AFP-ն, հղում անելով  ​​խմբավորմանը, հաղորդել է, որ ողջ պատանդները կփոխանակվեն մոտավորապես 2000 պաղեստինցի բանտարկյալների հետ՝ համաձայնագրի կնքումից  72 ժամվա ընթացքում։

«Միջնորդները հայտարարում են, որ այսօր երեկոյան համաձայնության են եկել Գազայում հրադադարի մասին համաձայնագրի առաջին փուլի իրականացման բոլոր դրույթների և մեխանիզմների վերաբերյալ, որը կհանգեցնի պատերազմի ավարտին, իսրայելցի պատանդների և պաղեստինցի բանտարկյալների ազատ արձակմանը և մարդասիրական օգնության մատակարարմանը», – X-ում  գրել է Կատարի արտաքին գործերի նախարարության խոսնակ Մաջեդ ալ-Անսարին: Գործարքի մանրամասները կհայտարարվեն ավելի ուշ, հավելել է նա:

ՄԱԿ-ի գլխավոր քարտուղար Անտոնիո Գուտերեշը ողջունել է Մերձավոր Արևելքում խաղաղության ուղղությամբ առաջընթացը: «Ես կոչ եմ անում բոլոր շահագրգիռ կողմերին լիովին պահպանել համաձայնագրի պայմանները: Բոլոր պատանդները պետք է ազատ արձակվեն արժանապատիվ կերպով: Պետք է ապահովվի մշտական ​​​​հրադադար: Մարտական գործողությունները  պետք է մեկընդմիշտ ավարտվեն», – գրել է նա X-ում: Գուտերեշի խոսքով՝ ՄԱԿ-ը կաջակցի համաձայնագրի իրականացմանը և այս ֆոնին՝ կմեծացնի մարդասիրական օգնության մատակարարումները Գազայի հատված։

Միաժամանակ նա կոչ է արել «անհապաղ և անարգել մարդասիրական օգնության և անհրաժեշտ առևտրային ապրանքների մուտքը» տարածաշրջան, ինչպես նաև օգտվել հնարավորությունից՝ մշակելու «օկուպացիային վերջ տալու, պաղեստինցի ժողովրդի ինքնորոշման իրավունքը ճանաչելու և երկու պետությունների լուծմանը տանող հուսալի քաղաքական ուղի»։ Գուտերեշի խոսքով՝ դա թույլ կտա իսրայելցիներին և պաղեստինցիներին ապրել խաղաղության և անվտանգության մեջ։

Թարգմանությունը՝ Էմմա Չոբանյանի