31.10.2026 | 22:55
Հայտնաբերվել է զինծառայողի դի. ՊՆ
Պուտինն ու Ալիևը կարող են հանդիպել ԱՊՀ գագաթնաժողովի շրջանակում
Քաղաքականություն
07.10.2025 | 22:57
ՌԴ նախագահի միջազգային հարցերով օգնական Յուրի Ուշակովը չի բացառել, որ Ռուսաստանի նախագահ Վլադիմիր Պուտինը և Ադրբեջանի նախագահ Իլհամ Ալիևը կարող են երկկողմ հանդիպում անցկացնել Դուշանբեում կայանալիք ԱՊՀ գագաթնաժողովի շրջանակում, գրում է ՏԱՍՍ-ը։
«Սովորաբար, այս տեսակի միջոցառումների ժամանակ, բնականաբար, տեղի են ունենում երկկողմ հանդիպումներ։ Կլինեն ինչպես նախապես համաձայնեցված, այնպես էլ «ոտքի վրա» հանդիպումներ, կամ հանդիպումներ, որոնց մասին կպայմանավորվեն գագաթնաժողովի ժամանակ։ Սա բոլոր գագաթնաժողովների աշխատանքի մի մասն է, կարևոր մասը», – ասել է Ուշակովը՝ պատասխանելով հարցին՝ արդյո՞ք նախատեսվում են երկկողմ քննարկումներ ԱՊՀ գագաթնաժողովի մասնակիցների հետ, որը տեղի կունենա հոկտեմբերի 10-ին Դուշանբեում։
Հստակեցնող հարցին՝ արդյո՞ք Ալիևը ներառված է այս ցուցակում, Ուշակովը նշել է, որ բացառված չէ։
«Օրինակ՝ Ալիևի հետ, ինչո՞ւ ոչ»,- ասել է Կրեմլի խոսնակը։
Հիշեցնենք, որ այսօր ավելի վաղ Ադրբեջանի նախագահ Իլհամ Ալիևը զանգահարել էր ՌԴ նախագահ Վլադիմիր Պուտինին ու շնորհավորել ծննդյան օրվա առթիվ։
Թարգմանությունը՝ Էմմա Չոբանյանի
