Դատարանը որոշեց Սերժ Սարգսյանի ու մյուս մեղադրյալների գույքի վրա արգելանք դնել․ ՏԵՍԱՆՅՈՒԹ

Հակակոռուպցիոն դատարանի դատավոր Արամ Գրիգորյանն այսօր որոշեց վարույթ ընդունել Հայաստանի երրորդ նախագահ Սերժ Սարգսյանից և նրա գործով մյուս մեղադրյալներ Ալեքսան Ալեքսանյանից ու Վալերի Նարիմանյանից գույք բռնագանձելու վերաբերյալ Դատախազության հայցը։ Սարգսյանը, Նարիմայանը և Ալեքսանյանը դատարանի որոշմամբ ճանաչվեցին գույքային պատասխանող և որպես հայցի ապահովման միջոց դատարանը որոշեց արգելանք դնել Սարգսյանի և մյուսների գույքի վրա։

Նշենք, որ նախորդ դատական նիստին հանրային մեղադրողը գույքային հայց նեկայացնելիս պահանջել էր շուրջ 4 մլրդ դրամի չափով գույք բռնագանձել Սարգսյանից։

Ըստ մեղադրանքի՝ Սերժ Սարգսյանը, 2000 թվականի մայիսի 20-ից մինչև 2007-ի ապրիլի 4-ն ընկած ժամանակահատվածում զբաղեցնելով ՀՀ պաշտպանության նախարարի պաշտոնը, նախարարության հաշվեկշռում գտնվող և ի պաշտոնե իրեն վստահված Երևանի Ծովակալ Իսակովի պողոտային և «Եռաբլուր» զինվորական պանթեոնին հարող տարածքներում գտնվող 17 միավոր անշարժ գույքերն ուղղակի վաճառքի ձևով շուկայական արժեքներից անհամեմատ ցածր գներով օտարել է իր մտերիմներին, ենթականերին, պետական մարմիններում պաշտոններ զբաղեցրած, ինչպես նաև այլ ֆիզիկական անձանց՝ այդ կերպ 15 դրվագ վատնման եղանակով և 2 դրվագ յուրացման եղանակով հափշտակելով Հայաստանի Հանրապետությանը պատկանող առանձնապես խոշոր չափերով գույքերը Նշենք, որ այս գործի հարուցումից հետո Գլխավոր դատախազությունն իր պաշտոնական հայտարարություններում, ինչպես նաև վարչապետ Նիկոլ Փաշինյանը՝ իր ելույթներում, հայտնում էին, թե օտարվել են «Եռաբլուր» զինվորական պանթեոնին պատկանող հողերը։

Սարգսյանը մեղադրանքը չի ընդունում։

Արաքս Մամուլյան