11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Հացն ու կարագը թանկացել են. 12-ամսյա գնաճը կազմել է 3.7%
Տնտեսություն
07.10.2025 | 15:40
2025 թվականի սեպտեմբերին 2024-ի սեպտեմբերի համեմատ 12-ամսյա գնաճը կազմել է 3.7%: Factor.am-ն այս մասին տեղեկանում է ՀՀ վիճակագրական կոմիտեից։
Այս տարի սեպտեմբերին նախորդ տարվա նույն ժամանակահատվածի համեմատ հանրապետությունում արձանագրվել է սննդամթերքի և ոչ ալկոհոլային խմիչքի 5.8% գնաճ։
2025թ. սեպտեմբերին 2024թ սեպտեմբերի համեմատ հանրապետությունում հացի գինն աճել է 5%-ով, ալյուրինը՝ 7.2%-ով։ Թռչնամսի գինը աճել է 1.9%-ով, տավարի, գառան և խոզի մսերինը՝ 3.1%, 4.9% և 9.4%-ով։
2025-ի սեպտեմբերին 2024-ի սեպտեմբերի համեմատ մածունի գինն աճել է 0.5%-ով, կաթնաշոռինը՝ 0.7%-ով, թարմ կաթինը՝ 1.5%-ով, պանրինը՝ 2.1%-ով, կարագինը՝ 12.5%-ով։ Արևածաղկի բուսական յուղի գինը աճել է 15.9%-ով։
Շոկոլադի գինը 2025թ. սեպտեմբերին 2024թ. սեպտեմբերի համեմատ աճել է 10.4%-ով, պաղպաղակինը՝ 10.5%-ով։ Թեյի գինն աճել է 3.5%-ով, սուրճինը՝ 14.2%-ով, կակաոյինը՝ 21.7%-ով։ Ձվի և հնդկացորենի գները նվազել են 3% և 0.6%- ով, սակայն այս տարվա սեպտեմբերին օգոստոսի համեմատ արձանագրվել է 3.1% և 0.8% գնաճ:
Ալկոհոլային խմիչքի և ծխախոտային արտադրատեսակների գները 2025-ի սեպտեմբերին 2024-ի սեպտեմբերի համեմատ աճել են 4.7% և 8.3%-ով։
Թանկացել են նաև միրգ-բանջարեղենի գները։ Բանջարեղենի ապրանքախմբում 2025-ի սեպտեմբերին 2024-ի սեպտեմբերի համեմատ գրանցվել է 2.4%, իսկ 2025-ի օգոստոսի համեմատ՝ 1.6% գնաճ: Մրգի ապրանքախմբում գներն աճել են 12.4%-ով։ Սեպտեմբերին այս տարվա օգոստոսի համեմատ արձանագրվել է 4.1% գնանկում:
Անի Թամրազյան
