«Եվրոպան կորցրել է իր կարևորությունը՝ զիջելով ահաբեկիչներին»․ Իսրայելի վարչապետ

Իսրայելի վարչապետ Բենիամին Նեթանյահուն Euronews-ին իր բացառիկ հարցազրույցում քննադատել է Եվրոպայի դիրքորոշումը Գազայի պատերազմի հարցում, ինչպես նաև Եվրամիության՝ հրադադարի պայմանագրի մշակման գործընթացից գործնականում դուրս մնալը։

Նեթանյահուն հայտարարել է, որ Եվրոպան չի մասնակցել Իսրայելի և ՀԱՄԱՍ-ի միջև հրադադարի ծրագրի մշակմանը, քանի որ «զիջել է պաղեստինյան ահաբեկչությանը և ռադիկալ իսլամիստական փոքրամասնություններին»։

«Հետևաբար Եվրոպան, ըստ էության, արդեն կորցրել է իր նշանակությունը՝ ցույց տալով մեծ թուլություն»,-նշել է նա՝ հավելելով, որ հենց ԱՄՆ նախագահ Դոնալդ Թրամփն է ստանձնել նախաձեռնությունը խաղաղության ծրագրի մշակման գործում։

Նա քննադատել է նաև ԵՄ անդամ 27 երկրներից 15-ի կողմից Պաղեստինի պետության ճանաչումը՝ նշելով, որ դա «պարգև» էր իսլամիստներին։ Նեթանյահուի կարծիքով՝ այդ որոշումը «ծանր հարված է» ոչ միայն Իսրայելին, այլև ամբողջ Մերձավոր Արևելքին։

«Պատկերացրեք, եթե սեպտեմբերի 11-ից հետո մարդիկ ասեին՝ եկեք պետություն տանք Ուսամա բեն Լադենին ու Ալ Քաիդային, ընդ որում՝ Նյու Յորքից ընդամենը մեկ մղոն հեռավորության վրա…»,-ընդգծել է Իսրայելի վարչապետը՝ համոզմունք հայտնելով, որ նման որոշումը խաղաղության չի հանգեցնի։

Իսրայելի վարչապետը հույս է հայտնել, որ Պաղեստինի պետականություն ճանաչած եվրոպական երկրները «կվերանայեն» իրենց դիրքորոշումը։

«Մենք կցանկանայինք ոչ միայն ունենալ լավ հարաբերություններ Եվրոպայի հետ, այլ լավ հարաբերություններ իրատեսական Եվրոպայի հետ, որը կնպաստի իրական խաղաղությանը, ոչ թե սարսափելի պատերազմի կրկնությանը»,-նշել է նա։

Նեթանյահուն հավելել է, որ մշտական կապի մեջ է եվրոպական կառավարությունների հետ և հույս ունի, որ «Եվրոպան կփոխի իր կուրսը, կվերանայի իրավիճակը՝ ոչ միայն հանուն Իսրայելի, այլ նաև հանուն իր սեփական շահերի»։