01.11.2026 | 21:01
Սարգիս Ստեփանյանը՝ հինգերորդ անգամ աշխարհի չեմպիոն
Տարիքն այլևս աշխատելու համար արգելք չի դառնա․ 65 տարին լրացած անձանց վերաբերյալ սահմանափակումն առաջարկվում է փոխել
Հասարակություն
05.10.2025 | 16:32
Աշխատանքի և սոցիալական հարցերի նախարարությունը հանրային քննարկման է ներկայացրել նախագծերի փաթեթ, որով նախատեսվում է մի շարք օրենքներից հանել պաշտոն զբաղեցնելու առավելագույն տարիքային շեմը։
65 տարին լրացած անձանց հնարավորություն կտրվի շարունակել աշխատել տվյալ օրենքների շրջանակում նախատեսված պաշտոններում։
Փաթեթի ընդունման դեպքում փոփոխությունը կվերաբերի քաղաքացիական ծառայողներին, համայնքային ծառայողներին, ՊՈԱԿ-ների տնօրեններին, վարչական պաշտոն զբաղեցնող աշխատակազմի ղեկավարներին և այլն։
Միաժամանակ, առաջարկվում է հանրային, համայնքային ու քաղաքացիական ծառայողներին, ինչպես նաև պետական կազմակերպության գործադիր մարմնի պաշտոնում նշանակված կամ ընտրության արդյունքում գործադիր մարմնի պաշտոնում նշանակված անձանց հնարավորություն տալ դառնալ խնամատար ծնող՝ ստանալով համապատասխան վարձատրություն երեխայի խնամքի և դաստիարակության համար։
Նշվում է՝ միայն տարիքը հիմք չի դիտարկվի պայմանագրի լուծման համար։ Առաջարկվող փոփոխություններով՝ տարիքային շեմի վերացման արդյունքում աշխատողների աշխատանքային հարաբերությունների դադարեցումը կիրականացվի օրենքներով սահմանված ընդհանուր հիմունքներով՝ դա չպայմանավորելով միայն տարիքի հիմքով։
«Հայաստանի Հանրապետության ժողովրդագրական իրավիճակի բարելավման 2024-2040 թթ. ռազմավարությամբ որպես ժողովրդագրության ոլորտում պետական քաղաքականության տեսլական սահմանված է բնակչության հավասարակշռված և կայուն կառուցվածքը՝ միտված բնակչության երկարաժամկետ մարդկային կապիտալի զարգացմանն ու կյանքի որակի բարձրացմանը։
Տեսլականի իրագործման համար սահմանված նպատակներից է հետևյալ նպատակը. «Ակտիվ, առողջ և արժանապատիվ ծերության պայմանների ապահովում՝ պետության սոցիալ-տնտեսական կյանքում ավագ սերնդի ներկայացուցիչների ներգրավմամբ ու իրենց ներուժի ավելացմամբ»։ Հիշյալ նպատակի մասնավոր նպատակներից մեկն էլ ավագ սերնդի ներուժի օգտագործումը խրախուսող միջավայրն է»,-նշվում է նախագծի հիմնավորման մեջ։
