Դատավճիռը լրիվ այլ հոդվածով է. Աջապահյանի պաշտպան․ ՏԵՍԱՆՅՈՒԹ

«Միքայել սրբազանը մեղադրվում էր Քրեական օրենսգրքի 422-րդ հոդվածի 2-րդ մասով նախատեսված արարք կատարելու համար, մինչդեռ, այսօր դատարանը պատժաչափը կարդալուց նրան մեղադրեց 442 հոդվածի 2-րդ մասով, որը լրիվ ուրիշ բանի մասին է՝

«Պաշտոնատար անձի կողմից ձեռնարկատիրական գործունեությանն ապօրինի մասնակցելը»,- այս մասին լրագրողների հետ զրույցում ասաց Միքայել արքեպիսկոպոս Աջապահյանի պաշտպան Արա Զոհրաբյանը:

«Մենք արձանագրեցինք, որ դատավորը վերդիկտով մեղավոր էր ճանաչել 422 հոդվածի համար, հիմա` դատավճիռը կարդաց 442 հոդվածով»,- պարզաբանեց Զոհրաբյանը:

Լրագրողի հարցադրմանը, որ գուցե հուզմունքն էր պատճառը, պաշտպանը արձագանքեց. «Այդ հուզմունքը մարդու ճակատագրերի վրա է ազդում, ակնհայտ է, որ սա պատվիրված ակտ էր և Միքայել սրբազանը չի կատարել ո´չ 422, ո´չ 442 նախատեսված արարք»,- ասաց Զոհրաբյանը:

Եթե հոդվածը սխալ է, դատավճիռն ունի՞ իրավական ուժ: «Տեսնենք»,- կարճ պատասխանեց պաշտպանը` նշելով, որ բողոքարկելու են դատավճիռը:

Նշենք, որ Երևանի ընդհանուր իրավասության առաջին ատյանի քրեական դատարանի դատավոր Արմինե Մելիքսեթյանը Շիրակի թեմի առաջնորդ Միքայել արքեպիսկոպոս Աջապահյանին դատապարտեց 2 տարվա ազատազրկման` չփոխելով խափանման միջոց կալանքը մինչև դատավճռի օրինական ուժի մեջ մտնելը: Նշենք, որ նախորդ լրացուցիչ դատական նիստում դատախազ Արման Բաղդասարյանը միջնորդել էր ազատազրկման դատապարտել 2 տարի 6 ամիս ժամկետով: Հիշեցնենք, որ Աջապահյանը մեղավոր է ճանաչվել զանգվածային լրատվամիջոցների, տեղեկատվական և հաղորդակցական տեխնոլոգիաների օգտագործմամբ իշխանությունը զավթելուն և սահմանադրական կարգը բռնի տապալելուն ուղղված հրապարակային կոչերի համար։ Արփի Հակոբյան