20.02.2026 | 23:28
ԱՄՆ-ն էլ է պահանջում, որ Ուկրաինան հանձնի ամբողջ Դոնբասը․ Զելենսկի
ՀՀ ԲՏԱ նախարարությունը և Meta-ն քննարկում են թվային համագործակցության խորացման ուղիները
Հասարակություն
02.10.2025 | 21:38
Հոկտեմբերի 2-ին ՀՀ բարձր տեխնոլոգիական արդյունաբերության նախարար Մխիթար Հայրապետյանն ընդունել է Meta ընկերության ներկայացուցիչներին՝ քննարկելու թվային քաղաքականության ոլորտում համագործակցության խորացման ուղիները: Այս մասին տեղեկացնում են ԲՏԱ նախարարությունից,
«Քննարկման առանցքում են եղել արհեստական բանականության (ԱԲ) տեխնոլոգիաների ներուժը՝ հասարակության և տնտեսության զարգացման համար, ինչպես նաև երեխաների առցանց անվտանգության վերաբերյալ իրազեկման ծրագրերի կարևորությունը։
Հանդիպման ընթացքում կարևորվել է Հայաստանի և Meta-ի միջև կառուցողական երկխոսության հաստատման և շարունակական զարգացման անհրաժեշտությունը։
Կողմերն ընդգծել են թվային էկոհամակարգում ի հայտ եկող մարտահրավերներին արձագանքելու նպատակով պարբերական քննարկումների կարևորությունը՝ սահմանելով գործնական քայլեր առցանց հարթակներում դիմադրողականությունն ու վստահությունը բարձրացնելու համար։
Քննարկման հիմնական թեմաներն են եղել արհեստական բանականության (ԱԲ) տեխնոլոգիաների կիրառումը՝ տնտեսության զարգացման նպատակով, մասնավորապես, տեղական նորարարության և բիզնեսի խթանման հնարավորությունների դիտարկմամբ, ինչպես նաև երեխաների անվտանգությունն առցանց միջավայրում՝ ընդգծելով նրանց և ծնողների թվային գրագիտության բարձրացմանն ուղղված համատեղ ջանքերի անհրաժեշտությունը։
Նախարար Հայրապետյանը վերահաստատել է Հայաստանի հանձնառությունը՝ խորացնելու կառուցողական փոխգործակցությունը համաշխարհային տեխնոլոգիական առաջատարների հետ՝ ընդգծելով նման համագործակցությունների կարևորությունը երկրի համապարփակ թվային վերափոխման ռազմավարության շրջանակում:
«Meta»-ի ներկայացուցիչները, իրենց հերթին, հաստատել են շարունակական երկխոսության և փորձի փոխանակման պատրաստակամությունը՝ աջակցելով Հայաստանի թվային առաջընթացին և ԱԲ էկոհամակարգի զարգացմանը։
Ամփոփելով՝ կողմերը պայմանավորվածություն են ձեռք բերել համատեղ մշակել հետագա քայլերը՝ ուղղված Հայաստանի թվային միջավայրի ամրապնդմանն ու ավելի անվտանգ և նորարարական առցանց միջավայրի ձևավորմանը»,- ասված է հաղորդագրությունում:
