Մարզական նոր ավան՝ հատուկ պահպանվող տարածքում

«Համահայկական խաղերի համաշխարհային կոմիտե» ՀԿ-ի կողմից «Ջրվեժ» անտառապարկում հանրային-մշակութային և սպորտային հանգստի գոտի կազմակերպելու նախագիծը ՇՄԱԳ-ի դրական եզրակացություն է ստացել։

Այս տարվա օգոստոսին ՀՀ կառավարությունը հավանություն էր տվել կազմակերպության ներդրումային ծրագրին և կառուցապատման նպատակով անտառապարկում 23.3 հա հողամաս տրամադրել 50 տարի ժամկետով։ Կազմակերպությունը պետք է ներդնի 20․9 մլրդ դրամ (մոտ 55 մլն դոլար) և 13 տարում կառուցի բազմաֆունկցիոնալ մարզական ավան, այդ թվում՝ 600 տնակներ, լողավազան, սպորտդահլիճներ, թենիսի կորտեր, լեռնադահուկային ուղիներ, բուգել ճոպանուղի, արհեստական ձյան համակարգ և այլն։

Ըստ նախագծի՝ յուրաքանչյուր տնակի համար անհրաժեշտ կլինի հարթեցնել 110-120 մ² հողատարածք։ Տնակների հավաքումը նախատեսվում է ոչ անտառածածկ տարածքներում։ Կազմակերպությունը պարտավորվել է նաև տնկել 20 հազար ծառ։

Նախագծում նշված է, որ մարզական ավանում կանցկացվեն Համահայկական ամառային և ձմեռային խաղերը։ Նշենք, որ մինչ օրս Համահայկական խաղերը կազմակերպվել են Երևանում, Գյումրիում, Վանաձորում, Աբովյանում, Արտաշատում, Ջերմուկում և այլն։

Ուշագրավ է, որ «Ջրվեժ» անտառպարկը հատուկ պահպանվող տարածք է, պատկանում է «Արգելոցապարկային համալիր» ՊՈԱԿ-ին։ Անտառպարկի բնական ֆլորան կազմված է ավելի քան 300 բարձրակարգ ծաղկավոր բուսատեսակներից, այստեղ աճում են նաև ՀՀ Կարմիր գրքում գրանցված հազվագյուտ և անհետացող 21 բուսատեսակներ՝ սոսի արևելյան, գիհի բազմապտուղ, գիհի կազակական, նշենի սովորական և այլն:

«Համահայկական խաղերի համաշխարհային կոմիտե» ՀԿ-ն նախագծով պարտավորվել է բարեկարգման տարածքներում ՀՀ Կարմիր գրքում գրանցված բուսատեսակների հայտնաբերման դեպքում՝ տեղեկացնել «Ջրվեժ» անտառպարկին, նախօրոք առանձնացնել հատուկ պահպանման գոտի՝ բույսերը տեղափոխելու և վերատնկելու համար։

Գայանե Խաչատրյան