Ալիևը համոզեց Արևմուտքին, որ ԼՂ-ը ՌԴ-ի հենակետն է, հայաթափելով՝ ռուսների ոտքը կտրում է․ փորձանք բերինք մեր գլխին․ Ռուբեն Մեհրաբյան. ՏԵՍԱՆՅՈՒԹ

«Հանուն հանրապետության» կուսակցության փոխնախագահ Ռուբեն Մեհրաբյանը Factor TV-ի հետ զրույցում ասում է, որ 2023 թվականի սեպտեմբերի 19-ին Ադրբեջանի կողմից ռազմական գործողությունները Լեռնային Ղարաբաղի դեմ,  հայերի բռնի տեղահանությունը և Արևմուտքի լռությունը հետևանք էր այն բանի, որ Ադրբեջանը արևմտյան կենտրոններին համոզել էր, որ այդպիսով՝ ինքը թուլացնում է Ռուսաստանի դերակատարությունը ռեգիոնում, հեռացնում է նրան այստեղից։

Ըստ Մեհրաբյանի՝ Ալիևը Արևմուտքին համոզել է, որ ԼՂ-ը Ռուսաստանի հենակետ է այս ռեգիոնում, և արդյունքում անպատիժ հայաթափել է այն․ «Ալիևը համոզեց Արևմուտքին, որ ԼՂ-ը ՌԴ-ի հենակետն է, մենք՝ հայերս, հայտնվել ենք փորձանքի մեջ նաև մեր քաղաքականության»,- ասել է Մեհրաբյանը՝ ընդգծելով պրոռուսական երկարատև քաղաքականությունը, որ վարվել է Արցախի և Հայաստանի ղեկավարության կողմից։

Ըստ նրա՝ 2020 թվականի պատերազմը ՀՀ-ի քաղաքական անկախության դեմ ուղղված գործիք էր․ «Մենք դարձանք ՌԴ-ի պատանդը», – նշեց նա՝ հավելելով, որ Ուկրաինայի պայքարը ՌԴ-ի դեմ թույլ չտվեց, որ ՌԴ-ն կլանի Հայաստանի անկախությունը։ Սակայն ըստ նրա, դա մշտական ռեսուրս չէ։ Մեհրաբյանը քննադատել է նաև հայաստանյան իշխանությունների վարքագիծը։ Նրա համոզմամբ, իշխանությունը պետք է ավելի ամուր ու կտրուկ քայլեր ձեռնարկի այն կուսակցությունների նկատմամբ, որոնք, նրա գնահատմամբ, պատասխանատվություն ունեն 2008-ի Մարտի 1-ի դեպքերի հետևանքով ստեղծված իրավիճակի համար։ 

«Իշխանությունը պիտի փակի այն կրիմինալ խմբավորումները՝ քաղաքական կուսակցությունների տեսքով, որոնք կապվում են Մարտի 1-ի սպանությունների հետ»,-  ասել է նա՝ հիշատակելով Եվրոպական դատարանի կարևոր որոշումը, որով ճանաչվել է անհամաչափ ուժի կիրառումը պետության կողմից ցուցարարների դեմ։ Նա պահանջեց, որ երկրի անվտանգությունն ապահովելու համար իշխանության կողմից անհրաժեշտ միջոցներ ձեռնարկվեն։ 

Հաղորդումն ամբողջությամբ՝ տեսանյութում։

Ռոբերտ Անանյան