29.04.2026 | 19:43
Հըմի էդ Հակոբիկի մոտ փող-մող ֆռո՞ւմ ա. ընտրակաշառքի գործով «Ուժեղ Հայաստան»-ի անունից գործող 5 անձ ձերբակալվել է. ՀԿԿ
Վստահ եղեք, որ մենք կպաշտպանենք ՆԱՏՕ-ի տարածքի յուրաքանչյուր սանտիմետրը․ ԱՄՆ-ը զգուշացրել է ՌԴ-ին
Քաղաքականություն
13.09.2025 | 15:12
Վաշինգտոնը զգուշացրել է Մոսկվային ՆԱՏՕ-ի անդամ երկրների տարածքային ամբողջականությունը խախտելու անթույլատրելիության մասին։ Այս մասին ՄԱԿ-ի Անվտանգության խորհրդի նիստում հայտարարել է ՄԱԿ-ում ԱՄՆ մշտական ներկայացուցիչ Դորոթի Շին․ տեղեկացնում է ՄԱԿ-ում ԱՄՆ մշտական ներկայացուցչության պաշտոնական էջը։
«Սեպտեմբերի 10-ին ռուսական ռազմական անօդաչու թռչող սարքերը խախտել են ՆԱՏՕ-ի անդամ երկիր Լեհաստանի օդային տարածքը։
Միացյալ Նահանգները մեր ՆԱՏՕ-ի դաշնակիցների կողքին է օդային տարածքի այս տագնապալի խախտումների պայմաններում։ Միացյալ Նահանգները խորհրդակցում է Լեհաստանի և ՆԱՏՕ-ի մյուս դաշնակիցների հետ՝ համաձայն Հյուսիսատլանտյան պայմանագրի 4-րդ հոդվածի, և վստահ եղեք, որ մենք կպաշտպանենք ՆԱՏՕ-ի տարածքի յուրաքանչյուր սանտիմետրը»,- ասել է Շին։
Ամերիկացի պաշտոնյան նաև նկատել է, որ այ միջադեպը չի նպաստում այն ջանքերին, որոնք Միացյալ Նահանգները վերջին շաբաթներին գործադրել է ռուս-ուկրաինական պատերազմը դադարեցնելու համար։
«Նախագահ Թրամփի և նախագահ Պուտինի միջև օգոստոսի 15-ին Ալյասկայում կայացած գագաթնաժողովից հետո Ռուսաստանը ակտիվացրել է իր ռմբակոծությունները Ուկրաինայում՝ վնասելով քաղաքացիական ենթակառուցվածքներ ու մարդկային զոհեր պատճառելով։
Իսկ ԱՄՆ դաշնակցի օդային տարածքի խախտումը՝ միտումնավոր կամ ոչ միտումնավոր, անհարգալից վերաբերմունք է Միացյալ Նահանգների կողմից այս հակամարտությունը դադարեցնելու բարի կամքի ջանքերի նկատմամբ»,- հայտարարել է Շին։
Հիշեցնենք, որ Լեհաստանի բանակի օպերատիվ հրամանատարությունը ավելի վաղ հայտնել էր, որ Ռուսաստանի Դաշնության կողմից Ուկրաինայի տարածքի վրա հարձակման ընթացքում խախտվել է նաև Լեհաստանի օդային տարածքը։ Հաղորդվել էր ԱԹՍ-ների խոցման մասին։
Թարգմանությունը՝ Անահիտ Խաչատրյանի
