Փաշինյանին «դավաճան» և «վիժվածք» անվանելու համար Վարուժան Ավետիսյանի որդու գործը նոր քննության է ուղարկվել

«Սասնա ծռեր» խմբի անդամ, ՊՊԾ գնդի գրավման գործով ազատազրկված Վարուժան Ավետիսյանի որդու՝ Դավիթ Ավետիսյանի գործի քննությունը կվերսկսվի․ Վերաքննիչ քրեական դատարանը մասնակի բավարարել է Ավետիսյանի պաշտպան Արայիկ Պապիկյանի բողոքը և բեկանել առաջին ատյանի դատարանի դատավճիռը և գործն ուղարկել նոր քննության։

Հիշեցնենք՝ նախորդ տարվա նոյեմբերին դատարանը վճռել էր ավելի քան կես մլն ՀՀ դրամի՝ 525 հազար դրամի չափով տուգանել Դավիթ Ավետիսյանին՝ ՀՀ վարչապետ Նիկոլ Փաշինյանին «դավաճան» և «վիժվածք» ասելու համար։

Հիշեցնենք՝ միջադեպը տեղի էր ունեցել 2024-ի հունիսի 30-ին․ ինչպես Factor TV-ին պատմել էր Դավիթ Ավետիսյանը, ինքն ու ընկերուհին զբոսնելիս են եղել Անգլիական այգում, երբ նկատել է վարչապետ Նիկոլ Փաշինյանին և նրա տիկնոջը՝ Աննա Հակոբյանին։

«Մոտեցա բրթեցի, մի քայլ հետ գնաց ու իմ սրտի խոսքն ասացի․ ասացի՝ զոհված ընկերներիս համար պատասխան ես տալու։ Էդ ժամանակ ձեռքերիցս բռնեցին թիկնապահները, Փաշինյանը մոտեցավ ու ասեց՝ եթե ուզում ես, կարող ենք կազմակերպել, գաս՝ խոսենք առանձին։ Ասեցի՝ քեզ հետ խոսելու բան չկա, դու ուղղակի պատասխան ես տալու։ Թիկնապահները պառկեցրին ինձ, նրանցից մեկը ձեռքը դրեց բերանիս, որ ձայն չհանեմ, շունչս սկսեց կտրվել»,-  պատմել էր նա։

Դավիթ Ավետիսյանին բռնի ուժով բերման են ենթարկել Կենտրոնի ոստիկանության բաժին, որտեղ փաստաբան Արայիկ Պապիկյանի հետ քննիչի աշխատասենյակի առաջ անցկացրել են ավելի քան 5 ժամ։ Փաստաբանի խոսքով՝ ոստիկանության աշխատակցի կողմից զեկուցագիր է կազմվել, որտեղ նշվել է, որ Դավիթը, մոտենալով վարչապետին, հայհոյել է նրան․

«Անվանել էր՝ «դավաճան» և «վիժվածք», սակայն դատաքննության ընթացքում մենք լեզվաբան-փորձագետի եզրակացություն էինք ներկայացրել, որտեղ նա նշել էր՝ այդ բառերը, ըստ հայոց լեզվի, հայհոյանք չեն»,- Factor TV-ի հետ զրույցում նշել էր Ավետիսյանի պաշտպան Արայիկ Պապիկյանը։

Միջադեպի հետևանքով՝ ոստիկանությունից ստացված հաղորդման առթիվ նախաձեռնել է քրեական վարույթ Քրեական օրենսգրքի 297-րդ հոդվածի առաջի մասի հատկանիշներով՝ խուլիգանություն, որը դրսևորվել է անձին ստորացնելով կամ մարդկանց անդորրը հայհոյանքով կամ անպարկեշտ արտահայտություններով խափանելով։ Հոդվածը սահմանում է, որ, եթե անձը մեղավոր ճանաչվի, նրան սպառնում է պատիժ՝ տուգանքով՝ առավելագույնը քսանապատիկի չափով, կամ հանրային աշխատանքով՝ 80-ից 150 ժամ տևողությամբ, կամ ազատության սահմանափակմամբ՝ առավելագույնը երկու տարի ժամկետով, կամ կարճաժամկետ ազատազրկմամբ՝ առավելագույնը մեկ ամիս ժամկետով, կամ ազատազրկմամբ՝ առավելագույնը երկու տարի ժամկետով: Փաստացի, Դավիթ Ավետիսյանի նկատմամբ կիրառվել էր տուգանքը․ թե ինչ նոր դատական ակտ կկայացվի նոր քննության արդյունքում, պարզ կդառնա դատաքննության ավարտից հետո։

Ռոզա Վարդանյան