ՌԴ-ում տուգանք կսահմանվի համացանցում «ծայրահեղական նյութեր» որոնելու համար

ՌԴ Պետդումայի պատգամավորներն աջակցել են «ակնհայտ ծայրահեղական նյութերի որոնման և դրանց հասանելիություն ստանալու», այդ թվում՝ VPN սերվիսների օգտագործման համար տուգանքներ սահմանող օրենսդրական փոփոխությանը, գրում է Meduza-ն։

Փոփոխությունը ներկայացվել է հուլիսի 14-ին՝ «տրանսպորտային և բեռնափոխադրման գործունեության ոլորտում որոշակի իրավախախտումների համար վարչական պատասխանատվության խստացման» վերաբերյալ օրինագծի երկրորդ ընթերցման համար։ Հեղինակներն առաջարկել են Վարչական իրավախախտումների վերաբերյալ օրենսգրքում ավելացնել նոր՝ 13.53 հոդված՝ «Ակնհայտ ծայրահեղական նյութերի որոնում և դրանց հասանելիություն, ներառյալ՝ տեղեկատվական ռեսուրսներին, տեղեկատվական և հեռահաղորդակցական ցանցերին մուտք գործելու համար ծրագրային և սարքային միջոցների օգտագործումը, որոնց հասանելիությունը սահմանափակված է»։

«Ծայրահեղական նյութերի դիտավորյալ որոնման» համար առաջարկվում է կիրառել վարչական տուգանք՝ երեքից հինգ հազար ռուբլու չափով։ VPN ծառայությունների գովազդի համար մինչև 500 հազար ռուբլի տուգանք սահմանելու մասին փոփոխությունը նույնպես ավելացվել է։

Համապատասխան փոփոխություններ են նախատեսվում կատարել Ռուսաստանի Դաշնության Վարչական իրավախախտումների մասին օրենսգրքի 14.3 հոդվածում (գովազդային օրենսդրության խախտում):

Առաջարկվում է քաղաքացիներին տուգանել 50-80 հազար ռուբլով VPN ծառայությունների գովազդ տարածելու համար, պաշտոնատար անձանց՝ 80-150 հազար ռուբլով, իսկ իրավաբանական անձանց՝ 200-500 հազար ռուբլով: Պետդուման նաև ընդունել է փոփոխություն, որով հանցագործության կատարումը ճանաչվում է որպես ծանրացուցիչ հանգամանք VPN ծառայությունների օգտագործմամբ:

Փոփոխությունը քննադատության է ենթարկվել, մասնավորապես, Կրեմլի քարոզիչ Մարգարիտա Սիմոնյանի և «Անվտանգ ինտերնետ» լիգայի ղեկավար Եկատերինա Միզուլինայի կողմից։

Ռուսաստանի նախագահի մամուլի քարտուղար Դմիտրի Պեսկովը հայտարարել է, որ «ծայրահեղական նյութեր» որոնելու համար տուգանք սահմանելու առաջարկը պահանջում է ավելի մանրամասն բացատրություններ։

Թարգմանությունը՝ Էմմա Չոբանյանի