12.09.2026 | 12:28
Օդեսայում ռուսական հարձակման հետևանքով բազմահարկ շենք է վնասվել․ տուժել է 23 մարդ
Ադրբեջանը պատրաստվում է գնել մոտ 800 միլիոն դոլար արժողությամբ կապի արբանյակ
Քաղաքականություն
17.07.2025 | 11:18
Ադրբեջանը պատրաստվում է ձեռք բերել մոտ 800 միլիոն դոլար արժողությամբ կապի խոշոր արբանյակ՝ իր հեռահաղորդակցության ենթակառուցվածքը ընդլայնելու, երկիրը համաշխարհային կենտրոնի վերածելու և իր աշխարհաքաղաքական դիրքը ամրապնդելու նպատակով։
Ըստ թուրքական GDH Digital լրատվական պորտալի՝ Ադրբեջանի համապատասխան կառույցները հայտարարել են միջազգային մրցույթ, որին մասնակցել են մի քանի հեղինակավոր ընկերություններ, գրում են ադրբեջանական լրատվամիջոցները։
Գործընթացը մոտենում է իր եզրափակիչ փուլին, որի արդյունքում վերջին փուլ են անցել չորս մասնակիցներ՝ թուրքական TUSAŞ-ը (Turkish Aerospace Industries), իսրայելական IAI-ը (Israel Aerospace Industries),ֆրանս-իտալական Thales Alenia Space-ը և Էլոն Մասկի SpaceX-ը։
Մրցույթի պայմանների համաձայն՝ հաղթող ընկերությունը պետք է մատակարարի արբանյակ, որը համապատասխանում է միջազգային ամենաբարձր չափանիշներին, բնութագրերով մոտ իսրայելական Dror 1-ին և ունակ է բավարարելու Ադրբեջանի ապագա կարիքները հեռահաղորդակցության և կապի ոլորտում։ Բաքվի նպատակը ոչ միայն տնտեսության դիվերսիֆիկացիան է, այլև իր դիրքերի ամրապնդումը համաշխարհային կապի շուկայում, ինչպես նաև աշխարհաքաղաքական լծակների ձեռքբերումը։
Նշվում է, որ ներկայում իսրայելական IAI-ը համարվում է մրցույթի ֆավորիտը։ Նախկինում այն հաջողությամբ համագործակցել է ադրբեջանական Azercosmos ընկերության հետ, ինչպես նաև Ադրբեջանին մատակարարել է զենք, այդ թվում՝ տարբեր տեսակի անօդաչու թռչող սարքեր, որոնց արժեքը միլիարդավոր դոլարների է հասնում։
2023 թվականի հոկտեմբերին IAI-ը պայմանագիր է կնքել Ադրբեջանին երկու OpSat-500 հետախուզական և դիտորդական արբանյակներ մատակարարելու համար՝ ընդհանուր 120 միլիոն դոլար արժողությամբ։ Այս պայմանագրի շրջանակներում, Իսրայելում ադրբեջանցի մասնագետներ են վերապատրաստվում այդ սարքերը շահագործելու համար։
Մրցույթի մեկ այլ մասնակիցը, Thales Alenia Space-ն է, սակայն, ինչպես հաղորդվում է, Բաքվի և Փարիզի միջև բարդ հարաբերությունները նվազեցնում են ընկերության հաղթելու հնարավորությունները: Միևնույն ժամանակ, առկա տվյալների համաձայն, ընկերությունը փորձում է շրջանցել այդ աշխարհաքաղաքական խոչընդոտը՝ Իտալիայի և Ադրբեջանի սերտ գործընկերության հաշվին։
Թարգմանությունը՝ Էմմա Չոբանյանի
