Քաղաքականություն
11.07.2025 | 20:43
Կարմիր ծովում հութիները խորտակել են երկու առևտրային նավ՝ «Magic Seas»-ը և «Eternity C»-ն: Երկու օր շարունակ անձնակազմերը փորձում էին հետ մղել հարձակումները, սակայն արևմտյան զինվորականներից ոչ մի օգնություն չեղավ: Հարձակումներն ուղեկցվել են անօդաչու թռչող սարքերի, հրթիռների և նռնականետերի արձակման սարքերի կիրառմամբ։ Առնվազն 3 մարդ զոհվել է, ևս 15-ը անհետ կորած է: Եմենում ամերիկյան առաքելության տվյալներով՝ նավաստիներից մի քանիսը գերեվարվել են հութիների կողմից: Սա հութիների կողմից առևտրային նավերի վրա իրականացված առաջին հաջող հարձակումն է նոյեմբերից ի վեր և ամենամահացուներից մեկը՝ նավագնացությունը խոչընդոտելու նրանց արշավի սկզբից ի վեր, որ նրանք իրականացնում են ՀԱՄԱՍ-ին աջակցելու և Գազայում պատերազմին ի պատասխան, ասվում է The Insider-ի անդրադարձում։
Eternity C-ի օպերատոր Cosmoship Management-ի սպան ասել է, որ փորձել է օգնություն խնդրել բրիտանական նավատորմից և եվրոպական Aspides առաքելությունից, սակայն իրեն ասել են, որ տարածքում նավեր չկան։
Պենտագոնի խոսնակը հայտարարել է, որ ԱՄՆ-ը չի վերանայել իր ռազմական ներկայությունը՝ ի պատասխան հարձակումների։ Պաշտոնապես, երկու ամիս առաջ Թրամփի հետ կնքված հրադադարը դեռևս ուժի մեջ է, քանի որ հարձակումները չեն թիրախավորել ամերիկյան նավերը։
Հարձակում Magic Seas-ի վրա
Հարձակումը սկսվել է հուլիսի 6-ի կեսօրին, երբ Magic Seas-ը Եմենի ափերի մոտով նավարկում էր դեպի Թուրքիա։ Նավը տեղափոխում էր պարարտանյութ և պողպատ։ Համատեղ ծովային տեղեկատվական կենտրոնի (JMIC) տվյալներով՝ չորս կամ հինգ փոքր նավակ մոտեցել են նավին և կրակ են բացել նրա պահակների հետ։ Հարձակվողներից մեկը կամրջակի վրա արձակել է նռնականետ։
Մեկուկես ժամ անց հարձակվող նավակների թիվը հասել էր յոթի կամ ութի։ Հրթիռը հարվածել է նավի պահեստին, որից հետո չորս նավակ միացել է հարձակմանը։ Պահակախումբը կրակ է բացել և ոչնչացրել դրանցից երկուսը, սակայն մնացած երկուսը հասել են իրենց նշանակետին։ Մեքենայի սենյակը սկսել է լցվել ջրով, և անձնակազմը լքել է նավը։ Հութիները նավ են բարձրացել, տեղադրել պայթուցիկներ և խորտակել նավը։ Ավելի ուշ նրանք հրապարակել են պայթյունի տեսանյութը։
Հարձակում Eternity C-ի վրա
Հուլիսի 7-ի երեկոյան, առաջին հարձակման վայրից ընդամենը հինգ մղոն հեռավորության վրա, Eternity C-ն, որը լողում էր դեպի Սաուդյան Արաբիա, նույն կերպ հարձակման է ենթարկվել։ Նրան շրջապատել են նռնակնետերվ նավակներ և մի շարք հարվածներ հասցրել ՝ շարժիչը խափանելով։ Wall Street Journal-ի կողմից լսված ռադիոհաղորդման մեջ լսվում է, թե ինչպես է օպերատորն ասում՝ «Mayday, mayday, mayday, մենք հարձակման տակ ենք»։
Մարտը շարունակվել է հաջորդ օրը, երբ հութիներն օգտագործել են հրթիռներ և անօդաչու թռչող սարքեր։ Առևտրային նավը փորձել է օգնության հասնել, բայց զինյալները փակել են մուտքերը։ Երբ Eternity C-ի պահակախմբի զինամթերքը սպառվել է, անձնակազմը լքել է նավը։
Cosmoship-ը վարձել է մասնավոր ընկերություն՝ փրկարարական գործողությունն իրականացնելու համար, և չորեքշաբթի առավոտյան ջրից դուրս է բերվել 10 նավաստի։ Եվս 15-ը համարվում է անհետ կորած, այդ թվում՝ առնվազն 3-ը մահացել է նավի վրա։ Հութիները հայտարարել են, որ մի քանի նավաստիների իրենց հետ վերցրել են։ ԱՄՆ-ը դա անվանում է առևանգում և պահանջում է նրանց ազատ արձակել։
Ընտրովի թիրախավորում և ազդեցություն համաշխարհային առևտրի վրա
Ըստ Vanguard Tech-ի գործադիր տնօրեն Էլի Շաֆիկի՝ սրանք հութիների ամենաավերիչ հարձակումներն են մինչ օրս, որոնց մարտավարությունը փոխվում է, և հարձակումները դառնում են ավելի համակարգված: Խումբը նախկինում նավեր է խորտակել՝ 2023 թվականի նոյեմբերին ՀԱՄԱՍ-ին աջակցելու իր արշավը սկսելուց ի վեր, բայց ոչ նման ինտենսիվությամբ:
«Magic Seas» նավը 2023 թվականի դեկտեմբերին մտել է Իսրայելի Աշդոդի նավահանգիստ, իսկ նույն օպերատորի մեկ այլ նավ, ինչ «Eternity C»-ն, հունիսին մտել է Հայֆա։ Սա ենթադրում է, որ հութիներն այժմ թիրախավորում են նույնիսկ այն նավերը, որոնք անուղղակիորեն կապված են Իսրայելի հետ։ «Windward»-ի գործադիր տնօրեն Ամի Դանիելը նշել է, որ սա կարող է ազդել աշխարհի նավատորմի զգալի մասի վրա և արդյունավետորեն «բաժանել համաշխարհային նավագնացության համակարգը»։
Մերձավոր Արևելքում բրիտանական նախկին ռազմածովային սպա և Neptune P2P մասնավոր ծովային անվտանգության ընկերության հետախուզության ղեկավար Քրիստոֆեր Լոնգը նշել է, որ Եմենի ափերի մոտ ռազմական ներկայության բացակայությունը առևտրային նավերը լիովին խոցելի է դարձրել տարածաշրջանի ամենավտանգավոր հատվածում: ԱՄՆ-ի, Բրիտանիայի ներկայացուցիչները և Aspides առաքելությունը հաստատել են, որ իրենց նավերը տարածքում չեն եղել։
Հութիներին, ՀԱՄԱՍ-ին և Հըզբոլլահին աջակցում է Իրանը: Թեհրանը վերջին ամիսներին մեծ կորուստներ է կրել Իսրայելի կողմից իր ռազմական ղեկավարության և միջուկային ծրագրի վրա հասցված մի շարք հարվածներից հետո: Այնուամենայնիվ, հութիները շարունակում են հարձակվել, և փորձագետները նշում են, որ խմբավորումը պահպանում է ինչպես հնարավորությունները, այնպես էլ քաղաքական կամքը՝ ապակայունացնելու նավագնացությունը։
Թարգմանությունը՝ Էմմա Չոբանյանի
