Քաղաքականություն
09.07.2025 | 12:34
ՌԴ-ն լույս չորեքշաբթի գիշերը ռեկորդային թվով անօդաչու թռչող սարքերով և հրթիռներով հարձակվել է Ուկրաինայի վրա. արձակվել է 728 անօդաչու թռչող սարք, 13 «Իսկանդեր» և «Կինժալ» հրթիռ։ Այս մասին հայտնել են Ուկրաինայի ռազմաօդային ուժերը առավոտյան հաղորդագրության մեջ, գրում է BBC-ի ռուսական ծառայությունը։ Ըստ ուկրաինական կողմի՝ 718 օդային թիրախներ, այդ թվում՝ բոլոր յոթ «Իսկանդեր» թևավոր հրթիռները, խփվել կամ ճնշվել են ռադիոէլեկտրոնային պայքարի միջոցներով։
Հարձակումների հիմնական թիրախը դարձել է Ուկրաինայի Վոլինի մարզի Լուցկ քաղաքը։ Քաղաքին հարվածել է մոտ 50 անօդաչու թռչող սարք և 5 հրթիռ։ Տուժածների մասին տեղեկություններ չեն հաղորդվում։ Գրանցվել է չորս հարված, խոցված անօդաչու թռչող սարքերի և հրթիռների բեկորները ընկել են 14 վայրում։
Վոլինի շրջանի ռազմական վարչակազմի ղեկավար Իվան Ռուդնիցկին հայտնել է, որ «գործնականում ամեն ինչ թռչում էր Լուցկի վրա»։ Նրա խոսքով՝ քաղաքի ձեռնարկություններից մեկի և ավտոտնակի կոոպերատիվի պահեստներում հրդեհաշիջման աշխատանքները շարունակվում են։ Նախնական տվյալներով՝ ոչ ոք չի տուժել։
Կիևի տարածաշրջանային ռազմական վարչակազմը նույնպես հայտնել է գիշերը ռուսական անօդաչու թռչող սարքերի կողմից իրականացված զանգվածային հարձակման մասին: Ըստ դրա ղեկավար Նիկոլայ Կալաշնիկի՝ Բրովարսկի շրջանում հարձակման հետևանքով վիրավորվել է 1980 թվականին ծնված մի կին, նախնական ախտորոշումը կրծքավանդակի փակ կոտրվածք է: Նա հոսպիտալացվել է:
Խերսոնում հուլիսի 9-ի առավոտյան ռուսական անօդաչու թռչող սարքերի հարձակումների հետևանքով վիրավորվել են Դնեպրովսկի շրջանի երկու բնակիչ՝ 73-ամյա տղամարդ և 47-ամյա մի տղամարդ։
Ուկրաինայի նախագահ Վլադիմիր Զելենսկին մեկնաբանել է «Ռուսաստանի կողմից նոր լայնածավալ հարձակումը»։
«Մեկ օրվա ընթացքում ամենաշատ օդային թիրախները՝ 741 թիրախ. տարբեր տեսակի 728 անօդաչու թռչող սարք, որոնցից ավելի քան 300-ը «Շահեդներ» և 13 հրթիռ՝ «Կինժալ» և «Իսկանդերներ»։ Թիրախների մեծ մասը խոցվել է», – գրել է նա։
Ուկրաինայի նախագահի խոսքով՝ հիմնական հարվածը հասցվել է Լուցկին։ Վնասներ են գրանցվել նաև Դնեպրի, Ժիտոմիրի, Կիևի, Կիրովոգրադի, Նիկոլաևի, Սումիի, Խարկովի, Խմելնիցկիի, Չերկասիի և Չեռնիգովի մարզերում։
«Սա ցուցադրական հարձակում է, և հատկապես հիմա, երբ խաղաղության հասնելու, կրակը դադարեցնելու այդքան շատ փորձեր են եղել, և միայն Ռուսաստանն է մերժում ամեն ինչ։ Եվս մեկ ապացույց, որ պատժամիջոցներ են անհրաժեշտ՝ ցավոտ պատժամիջոցներ նավթի դեմ, որը պատերազմի ավելի քան երեք տարվա ընթացքում Մոսկվայի ռազմական մեքենան փողով է լիցքավորում։ Երկրորդային պատժամիջոցներ նրանց դեմ, որոնք գնում են այս նավթը և հովանավորում սպանությունները», – նշել է Ուկրաինայի նախագահը։
Նա խոսքով՝ Ուկրաինայի դաշնակիցները գիտեն, թե ինչպես ճնշում գործադրել Ռուսաստանի վրա, որպեսզի այն «ստիպված լինի մտածել պատերազմը դադարեցնելու, այլ ոչ թե նոր հարվածների մասին», և կոչ է արել նրանց գործել։
Ռուսաստանի կողմից օդային հարձակումներից ամենալայնածավալը եղել էր հուլիսի 4-ին, երբ ռուսական զորքերն արձակել էին 550 անօդաչու թռչող սարք և հրթիռ։
Թարգմանությունը՝ Էմմա Չոբանյանի
