20.02.2026 | 23:28
ԱՄՆ-ն էլ է պահանջում, որ Ուկրաինան հանձնի ամբողջ Դոնբասը․ Զելենսկի
Դուք ավելի մեղադրական դիրքորոշում ունեք, քան մեղադրողը․ նախկին դատախազը՝ դատավորին․ ՏԵՍԱՆՅՈՒԹ
Հասարակություն
08.07.2025 | 15:15
Արմավիրի մարզի դատախազության նախկին դատախազ Ապրես Գրիգորյանն իր գործով դատական նիստի ընթացքում այսօր ցանկանում էր իր նկատմամբ ընտրված խափանման միջոց բացակայելու արգելքը ավելի խիստ խափանման միջոցով՝ գրավով փոխարինելու միջնորդություն ներկայացնել, որպեսզի հնարավորություն ունենար 4 օրով դուրս գալ Հայաստանի Հանրապետությունից։
Գրիգորյանը դատարանին ներկայացրեց Վրաստանում հյուրանոց ամրագրելը հաստատող փաստաթուղթ։ Դատավոր Վարդգես Ստեփանյանը, սակայն, հայտնեց, որ դատարանն այժմ դատավարականն այլ փուլում է գտնվում, մեղադրյալի խափանման միջոցի հարցին արդեն նախկինում անդրադարձել է, իսկ եթե անհրաժեշտություն լինի, մեղադրյալի խափանման միջոցի հարցին կարող է անդրադառնալ լրացուցիչ նիստ հրավիրելով, ուստի՝ չի պատրաստվում խախտել քրեական դատավարության օրենսգրքով սահմանված գործողությունների հաջորդականությունը։
Մեղադրյալ Ապրես Գրիգորյանը նշեց, որ դատավորի գործողություններն իրեն հիմք էլ տալիս ամրապնդելու իր համոզմունքը, որ դատավորը կողմնակալ է իր նկատմամբ։
Նշենք, որ մայիսի 15-ին տեղի ունեցած դատական նիստի ընթացքում դատավոր Վարդգես Ստեփանյանը Գրիգորյանի պաշտպան Զոյա Սակովայի նկատմամբ սանկցիա կիրառեց արևային ակնոցը գլխից չհանելու համար, իսկ նախորդ նիստի ընթացքում դատավորը միջնորդությունը պաշտպանական կողմի ձեռքից վերցրել ու անձամբ էր ներկայացրել։
Ապրես Գրիգորյանը պահանջել է իրեն տրամադրել երկու նիստերի արձանագրություները, սակայն դատավոր Ստեփանյանը արձանագրություներից առաջինը հուլիսի 2-ին ուղարկել է պաշտպան Զոյա Սակովային, իսկ հաջորդ նիստի արձանագրությունն էլ տրամադրել է Գրիգորյանին։
Ապրես Գրիգորյանը դատարանին հայտնեց, որ պատրաստվում է բացարկի միջնորդություն ներկայացնել նրան, ուստի պետք է ունենա նիստերի արձանագրությունները, որպեսզի կարողանա համապարփակ կերպով ներկայացնել միջնորդությունը։
«Դուք ավելի մեղադրական դիրքորոշում ունեք, քան հանրային մեղադրողը»,- դիմելով դատավորին՝ ասաց Ապրես Գրիգորյանը՝ պնդելով, որ եթե անգամ դատավորն ի պաշտպանին տրամադրել է նիստի արձանագրություններից մեկը, ինքը ևս, որպես մեղադրյալ, իրսվունք ունի անվճար ստանալու նիստի արձանագրությունը։
Դատավոր Վարդգես Ստեփանյանը նշեց, որ Factor TV-ի լրագրողը ներկա է գտնվել և տեսանկարահանման միջոցով հրապարակել է այդ դատական նիստում տեղի ունեցող իրադաձությունները, որի արձանագրությունը պահանջում է Ապրես Գրիգորյանը, բայց,այնուամենայնիվ, ստիպված եղավ նիստը հետաձգել, որպեսզի մեղադրյալին տրամադրի նիստի արձանագրությունը։
Հիշեցնենք, որ Ապրես Գրիգորյանն, ըստ մեղադրանքի, տարեկան հայտարարագրերում ներկայացրել է կեղծ տվյալներ և թաքցրել է հայտարարագրման ենթակա տվյալներ: Նա մեղադրանքը չի ընդունում։
Մանրամասները՝ տեսանյութում։
Արաքս Մամուլյան
