17.02.2026 | 23:22
ՀՀ ԱԳ նախարարի տեղակալը Հռոմում ներկայացրել է COP17-ի Հայաստանի նախագահության առաջնահերթությունները
Փաշինյանն արեց այն, ինչ ես չարեցի 2011-2012 թվականներին․ Սաակաշվիլի
Քաղաքականություն
07.07.2025 | 14:02
«Անհաջող պատերազմից հետո Փաշինյանը Հայաստանում արեց այն, ինչ ես չեմ արել 2011-2012 թվականներին․ նա ձերբակալել է հայ Իվանիշվիլիին (Բիձինա Իվանիշվիլի՝ իշխող «Վրացական երազանք» կուսակցության հիմնադիր)՝ միլիարդատեր Կարապետյանին (նկատի ունի Սամվել Կարապետյանին)»։ Այս մասին ֆեյսբուքյան գրառմամբ հայտարարել է Վրաստանի նախկին նախագահ Միխեիլ Սաակաշվիլին՝ հավելելով, թե Փաշինյանը պաշտոնապես ընտրել է ԵՄ անդամակցության կուրսը։
Նա հավելել է՝ Հարավային Կովկասում տեղի ունեցողը Ռուսաստանի թուլացման ուղղակի հետևանքն է Ուկրաինայում։
«Բաքուն սկսել է համագործակցել ՆԱՏՕ-ի հետ, Ադրբեջանը Ռուսաստանին համարում է ուղղակի սպառնալիք և ակտիվ քայլեր է ձեռնարկում իր քաղաքական, տնտեսական և մշակութային տարածքը ռուսական ազդեցությունից մաքրելու համար։ Բացի այդ, Ադրբեջանն ու Հայաստանը սկսել են մերձենալ, ինչը ծանր հարված է Ռուսաստանին»,- գրել է Վրաստանի նախկին նախագահը։
Այս իրավիճակում, ըստ նրա, Վրաստանում լիակատար անոմալիա է տիրում․ մի կողմից՝ «հասարակությունը սկսել է ատել Իվանիշվիլիին և նրա ավազակախմբին, իսկ այդ ավազակախմբի բռնությունը, անամոթությունն ու անարդարությունը վրացիներին արդարացիորեն համոզում են, որ միջազգային մեկուսացումն աղետալի է իրենց համար»։
«Այս իրավիճակում բոլորս հասկանում ենք, որ սա չի կարող շարունակվել, և ինչ-որ բան կպատահի։ Սակայն մենք պետք է հասկանանք, որ այս «ինչ-որ բանը» ինքն իրեն չի պատահի։ Հասարակության ակտիվ մասը պետք է նախաձեռնություն ցուցաբերի և դադարի նույն շրջապտույտով գնալուց։ Աշխարհաքաղաքական գործընթացները մեզ շատ են օգնում, բայց մենք նաև ժամանակ չունենք վատնելու։ Առաջնորդների պակասի պայմաններում ինքնակազմակերպումը միակ ճիշտ ելքն է»,- նշել է Սաակաշվիլին։
Ավելի վաղ էլ նա հայտարարել էր, թե ՀՀ վարչապետ Նիկոլ Փաշինյանը «կրկնում է իրենց բարեփոխումները»։
Թարգմանությունը՝ Էմմա Չոբանյանի
