ԱՄՆ-ն առևտրային համաձայնագիր է ստորագրել Չինաստանի հետ

ԱՄՆ նախագահ Դոնալդ Թրամփը հայտարարել է, որ Միացյալ Նահանգները հունիսի 25-ին առևտրային համաձայնագիր է ստորագրել Չինաստանի հետ։ Նա ասել է, որ ԱՄՆ կառավարությունը նմանատիպ համաձայնագիր է նախատեսում Հնդկաստանի հետ, փոխանցում է  Current time-ը։

«Մեզ մոտ հիանալի գործարքներ են նախանշվում։ Հնարավոր է՝ մենք գործարք ունենանք Հնդկաստանի հետ։ Շատ խոշոր։ Մենք կբացենք Հնդկաստանը (ամերիկյան բիզնեսի համար)։ Չինաստանի հետ գործարքում մենք սկսում ենք բացել Չինաստանը», – ասաց Թրամփը։ Նա որևէ մանրամասն չի հայտնել  համաձայնագրի վերաբերյալ։

ԱՄՆ առևտրի նախարար Հովարդ Լյուտնիկը Bloomberg News-ին ասել է, որ ԱՄՆ-ն և Չինաստանը ավարտել են մայիսին Ժնևում  ձեռք բերված առևտրային համաձայնագրի ձևակերպումը։ Նա ասել է, որ համաձայնագիրը ամրապնդում է Պեկինի և Վաշինգտոնի միջև համաձայնեցված պայմանները։

«Նրանք մեզ կմատակարարեն հազվագյուտ մետաղներ։ Եվ երբ դա տեղի ունենա, մենք կվերացնենք մեր պատասխան միջոցառումները», – ասել է Լյուտնիկը։

Դոնալդ Թրամփը հավելել է, որ ԱՄՆ-ն չի պլանավորում գործարքներ կնքել բոլոր երկրների հետ։ Նրա խոսքով՝ վարչակազմը «պարզապես նամակներ կուղարկի որոշ երկրների՝ տեղեկացնելով նրանց, որ նրանք կվճարեն 25%, 35%, 45%» մաքսատուրքեր։

Եվրահանձնաժողովի նախագահ Ուրսուլա ֆոն դեր Լեյենը հայտարարել է, որ ԵՄ-ն պատրաստ է առևտրային համաձայնագիր կնքել ԱՄՆ-ի հետ, բայց նաև պատրաստ է այն փաստին, որ նման համաձայնագիր չի լինի։ Նա նշել է, որ Կանադայում կայացած G7 գագաթնաժողովում «արդյունավետ քննարկում» է ունեցել Դոնալդ Թրամփի հետ։

«Այսօր մենք ԱՄՆ-ից նոր փաստաթուղթ ենք ստացել հետագա բանակցությունների համար։ Այժմ մենք այն վերլուծում ենք», – ասել է ֆոն դեր Լեյենը ԵՄ գագաթնաժողովից հետո տեղի ունեցած մամուլի ասուլիսում։

Նա ասել է, որ ԵՄ-ն ի պատասխան պահուստում ունի տասնյակ միլիարդավոր եվրոյի մաքսատուրքեր և կարող է դրանք կիրառել, եթե համաձայնություն ձեռք չբերվի։

«Մենք կպաշտպանենք Եվրոպայի շահերը անհրաժեշտության դեպքում։ Ամփոփելով՝ բոլոր տարբերակները մնում են սեղանին», – նշել է  ֆոն դեր Լեյենը։

Հիշեցնենք, որ ապրիլի 2-ին Թրամփը հայտարարել էր ամերիկյան տնտեսության «ազատագրման օր» և մաքսատուրքեր սահմանել 185 երկրի և տարածքների, այդ թվում՝ Միացյալ Նահանգների ամենամոտ գործընկեր երկրներից ներմուծվող ապրանքների վրա։

Ապրիլի 9-ին նա դադարեցրել էր բոլոր երկրների համար մաքսատուրքերի սահմանումը՝ հիմնական մաքսատուրքը նվազեցնելով մինչև 10%, բացառություն անելով միայն Չինաստանի համար, որի համար նա բարձրացրել էր մաքսատուրքերը։ Չինաստանը պատասխանել էր՝ բարձրացնելով ներմուծման մաքսատուրքերը։ Արդյունքում, ապրիլի 11-ին Չինաստանից ԱՄՆ ապրանքների վրա մաքսատուրքերի ընդհանուր գումարը կազմել էր 145%, իսկ ԱՄՆ-ից Չինաստան ապրանքների վրա՝ 125%։ Սակայն, արդեն մայիսի կեսերին կողմերը համաձայնության եկան մաքսատուրքերը նվազեցնելու վերաբերյալ. ԱՄՆ-ն՝ մինչև 30%, իսկ Չինաստանը՝ մինչև 10%։

Թրամփի վարչակազմը հայտարարել էր որոշ մաքսատուրքերի 90-օրյա չեղարկման մասին՝ առևտրային բանակցությունները շարունակելու համար։ Մինչ այժմ ստորագրվել է միայն մեկ  առևտրային համաձայնագիր՝ Մեծ Բրիտանիայի հետ։

Թարգմանությունը՝ Էմմա  Չոբանյանի