Իսրայելը համաձայնել է Իրանի հետ հրադադարի ԱՄՆ առաջարկին

Իսրայելը հաստատել է, որ համաձայնել է Իրանի հետ երկկողմանի հրադադարի ԱՄՆ առաջարկին, սակայն «խիստ կարձագանքի» հրադադարի ցանկացած խախտման։

Իսրայել վարչապետ Բենիամին Նեթանյահուի գրասենյակի հայտարարության մեջ ասվում է, որ նա հանդիպել է կաբինետի, պաշտպանության նախարարի, Իսրայելի պաշտպանության բանակի շտաբի պետի և Մոսադի ղեկավարի հետ՝ «տեղեկացնելու համար, որ Իսրայելը հասել է«Առյուծի վերելքը» գործողության բոլոր նպատակներին և մի բան էլ ավելին»։

«Իսրայելը վերացրել է անմիջական գոյության սպառնալիքը՝ թե՛ միջուկային, թե՛ բալիստիկ հրթիռների հետ կապված», – ասվում է հայտարարության մեջ։

Հայտարարության համաձայն՝ «Իսրայելի պաշտպանության բանակը լիակատար օդային վերահսկողություն է հաստատել Թեհրանի երկնքի նկատմամբ, լուրջ վնաս է հասցրել ռազմական ղեկավարությանը և ոչնչացրել Իրանի կառավարության տասնյակ կենտրոնական թիրախներ»։

Նաև առաջին անգամ հայտարարվում է, որ սպանվել է միջուկային ոլորտի ևս մեկ ավագ գիտաշխատող։

«Անցած օրվա ընթացքում Իսրայելի պաշտպանության բանակը խոշոր հարվածներ է հասցրել Թեհրանի սրտում գտնվող ռեժիմի թիրախներին, վերացրել է հարյուրավոր Բասիջ գործակալների՝ ռեժիմի ճնշման ապարատի, և սպանել է ևս մեկ  միջուկային ոլորտի ավագ գիտաշխատողի», – ասվում է հայտարարության մեջ՝ հավելմամբ․

«Իսրայելը շնորհակալություն է հայտնում նախագահ Թրամփին և Միացյալ Նահանգներին՝ պաշտպանությանը ցուցաբերած աջակցության և իրանական միջուկային սպառնալիքի վերացմանը մասնակցության համար։ Գործողության նպատակներին հասնելու լույսի ներքո և նախագահ Թրամփի հետ լիովին համակարգմամբ՝ Իսրայելը համաձայնել է նախագահի երկկողմանի հրադադարի առաջարկին»։Նշվում է, որ Իսրայելը «ուժգին կարձագանքի հրադադարի ցանկացած խախտման»։

Ավելի վաղ ԱՄՆ նախագահ Դոնալդ Թրամփը հայտարարել էր, որ կողմերի միջև հրադադարն ուժի մեջ է մտել։

Թարգմանությունը՝ Էմմա Չոբանյանի