Բիտումի ներկրման խնդիրներ կան․ ՏԿԵՆ

«Բիտումի ներկրման հետ կապված տեխնիկական խնդիրներ կան, շինարարները դժվարանում են ներկրումներ անել»,- Factor.am-ի հետ զրույցում ասաց Տարածքային կառավարման և ենթակառուցվածքների նախարարության մամուլի խոսնակ Սոնա Հարությունյանը։

«Ներկրման դժվարությունը այս պահի դրությամբ ճանապարհաշինարարական աշխատանքների վրա լուրջ ազդեցություն չունի, քանի որ շինարարաները կուտակած պաշարներ ունեն և աշխատանքները դրա հաշվին ընթանում են։ Եթե իրավիճակը երկար շարունակվի, ռիսկ կա, որ առաջիկայում հնարավոր է խնդիրներ առաջանան»,- նշեց Հարությունյանը։

Բիտումը կիրառվում է ճանապարհաշինության մեջ, այն Հայաստան է ներկրվում հիմնականում Իրանից։ Մասնավորապես՝ 2024 թվականի առաջին կիսամյակում (տարեկան տվյալները ՊԵԿ-ը դեռևս չի հրապարակել) Իրանից Հայաստան է ներկրվել 33,049 տոննա բիտում։ Փոքր քանակությամբ բիտում ներկրվել է նաև Ռուսաստանից՝ 852 տոննա, և Իրաքից՝ 24 տոննա։ 2022-ին բիտում ներկրվել է նաև Արաբական միացյալ էմիրություններից՝ ընդհանուր 795․5 տոննա, սակայն այն մոտ 1․5 անգամ թանկ է եղել իրանականից։

Ոլորտի տնտեսվարողները Factor.am-ի հետ զրույցում մտավախություն են հայտնել, որ եթե Իրանի և Իսրայելի միջև հակամարտությունը տևական դառնա, մեծ է հավանականությունը, որ բիտումի ներմուծումը Հայաստան պարզապես կդադարի, հետևաբար՝ խնդիրներ կծագեն ճանապարհների ասֆալտապատման հետ կապված։

Անի Թամրազյան