19.08.2026 | 09:33
ՀՀ տարածքում ավտոճանապարհներն անցանելի են
ՀՀ-ի հետ կապերի մեջ մեղադրվող ադրբեջանցի ակտիվիստը դատապարտվել է 15 տարվա ազատազրկման
Քաղաքականություն
23.06.2025 | 16:02
Բաքվի ծանր հանցագործությունների դատարանն ավարտել է պետական դավաճանության մեջ մեղադրվող ադրբեջանցի երիտասարդ հետազոտող, ակտիվիստ Բահրուզ Սամեդովի դատավարությունը։
Դատավճիռը հրապարակվել է դատավոր Էլնուր Նուրիևի նախագահությամբ անցկացված դատավարության ժամանակ։ Բահրուզ Սամեդովը դատապարտվել է 15 տարվա ազատազրկման խիստ ռեժիմի ուղղիչ հիմնարկում։
Նախորդ դատական նիստին պետական մեղադրողը պահանջել էր Սամեդովին դատապարտել 16 տարվա ազատազրկման։
Նշենք, որ Բահրուզ Սամեդովը ձերբակալվել է անցյալ տարվա օգոստոսին Պետական անվտանգության ծառայության (ՊԱԾ) կողմից իրականացված օպերատիվ-հետախուզական միջոցառումների արդյունքում։
Նրան մեղադրանք է առաջադրվել Ադրբեջանի քրեական օրենսգրքի 274-րդ հոդվածով (պետական դավաճանություն)։ Սամեդովը չի ընդունում մեղքը և հերքում է մեղադրանքները։ Նա ընդգծում է, որ պետական դավաճանության մեղադրանքը հորինված է, և իր ցուցմունքում նշել է, որ չնայած իրեն մեղադրում են Հայաստանի հատուկ ծառայությունների հետ համագործակցելու մեջ, դրա վերաբերյալ որևէ ապացույց չի ներկայացվել։
Հունիսի 21-ին Սամեդովը ինքնասպանության փորձ է կատարել՝ ի նշան մեղադրողի կողմից պահանջված պատժաչափի դեմ բողոքի։ Նրան վերջին պահին փրկել է խցակիցը։ Սամեդովը հունիսի 19-ից էլ հացադուլ է իրականացնում։
Սամեդովը նշում է, որ ինքը խաղաղության կողմնակից է և դեմ է պատերազմին։ Նրա ելույթներն ու հոդվածները նույնպես նվիրված են այս թեմային։ Ակտիվիստը հայտարարում է, որ իրեն պատժել են կեղծ մեղադրանքով՝ լռեցնելու համար։
Թարգմանությունը՝ էմմա Չոբանյանի
