28.10.2026 | 23:23
Քննարկվել են Լուվրի և Հայաստանի պատմության թանգարանի միջև համագործակցության հեռանկարները
Ադրբեջանի դատախազությունը դատարանից պահանջում է ՀՀ-ի հատուկ ծառայությունների հետ գործակցության մեջ մեղադրվող ակտիվիստին դատապարտել 16 տարվա ազատազրկման
Քաղաքականություն
20.06.2025 | 22:47
Բաքվի ծանր հանցագործությունների դատարանում տեղի է ունեցել Չեխիայի Չարլզի համալսարանի ասպիրանտ, ադրբեջանցի երիտասարդ հետազոտող, խաղաղության ակտիվիստ Բահրուզ Սամեդովի գործով հերթական դատական նիստը, որը մեղադրվում էր դավաճանության մեջ։ Դատական նիստում պետական մեղադրողը պահանջել է Սամեդովին դատապարտել 16 տարվա ազատազրկման։
Մինչ մեղադրողի ելույթը, փաստաբանը բողոքել է դատավարության ավարտի դեմ և մի քանի միջնորդություններ ներկայացրել։ Սակայն բոլոր միջնորդությունները մերժվել են։
Սամեդովը ձերբակալվել է 2024 թվականի օգոստոսի 21-ին Պետական անվտանգության ծառայության կողմից։ Սաբայիլի շրջանային դատարանը նրա նկատմամբ խափանման միջոց է ընտրել կալանքը՝ Քրեական օրենսգրքի 274-րդ հոդվածի (պետական դավաճանություն) համաձայն։
Սամեդովը չի ընդունում մեղքը և հերքում է մեղադրանքները։ Նա ընդգծում է, որ պետական դավաճանության մեղադրանքը հորինված է, և իր ցուցմունքում նշել է, որ չնայած իրեն մեղադրում են հայկական հատուկ ծառայությունների հետ համագործակցելու մեջ, դրա վերաբերյալ որևէ ապացույց չի ներկայացվել։
Սամեդովը նշում է, որ ինքը խաղաղության կողմնակից է և դեմ է պատերազմին։ Նրա ելույթներն ու հոդվածները նույնպես նվիրված են այս թեմային։ Նա կարծում է, որ իրեն պատժել են կեղծ մեղադրանքով՝ իրեն լռեցնելու համար։
Սամեդովը հայտնի է տարբեր ԶԼՄ-ներում Ադրբեջանի իշխանությունների մասին քննադատական հոդվածներով, ԼՂ հակամարտության վերաբերյալ խաղաղասիրական դիրքորոշմամբ։ ԵՄ-ն և մի շարք միջազգային կազմակերպություններ դատապարտել են Ադրբեջանի իշխանությունների կողմից Բահրուզ Սամեդովի նկատմամբ հետապնդումները։
Վերջերս նա բանտից դիմել էր ՀՀ վարչապետ Նիկոլ Փաշինյանին՝ խնդրելով հրապարակել պաշտոնական և հիմնավորված հայտարարություն, որ ինքը երբևէ որևէ համագործակցություն չի ունեցել Հայաստանի արտաքին հետախուզական ծառայությունների հետ։
Թարգմանությունը՝ Էմմա Չոբանյանի
