Իսրայելը հայտնում է Իրանին «աննախադեպ հարվածներ» հասցնելու մասին, Թեհրանը հարվածել է էլեկտրակայանի

Իսրայելի պաշտպանության բանակի թարմացված գնահատականների համաձայն որոշ ժամանակ առաջ Իրանից չորս ալիքով արձակվել է ընդհանուր առմամբ 6 կամ 7 հրթիռ, գրում է The Times of Israel-ը։

Նշվում է, որ հրթիռները արձակվել են 40 րոպեի ընթացքում։ Զոհերի մասին տեղեկություններ չկան։ Մի քանի հարվածներ են գրանցվել բաց տարածքներում։

Իսրայելի էլեկտրաէներգիայի կորպորացիան հայտնում է, որ երկրի հարավում գտնվող «ռազմավարական ենթակառուցվածքային օբյեկտի»՝ էլեկտրակայանի մոտ իրանական բալիստիկ հրթիռի հարվածի հետևանքով տարածաշրջանի մի քանի քաղաքներում էլեկտրաէներգիայի խափանումներ են։

«Խմբերը մեկնում են մի քանի վայրեր՝ էլեկտրաէներգիան հնարավորինս արագ վերականգնելու համար։ Գործողությունները ներառում են ենթակառուցվածքների վերանորոգում և անվտանգության սպառնալիքների վերացում, և իրականացվում են անվտանգության ուժերի հետ համակարգված աշխատանքով»,- ասվում է հաղորդագրության մեջ։

Միաժամանակ հաղորդվում է Իսրայելի կողմից Իրանին հասցվող հարվածների մասին, որոնց տեսանյութերը տարածվում են համացանցում։ Նշվում է, որ Թեհրանում պայթյուններ են տեղի ունեցել իրանական Կարմիր մահիկի գրասենյակի մոտ։

Իսրայելի բանակը հայտնում է, որ ռազմաօդային ուժերը հարվածների ալիք են սկսել Թեհրանում գտնվող իրանական ռազմական օբյեկտների ուղղությամբ։ Իսրայելի պաշտպանության նախարար Իսրայել Կացը նշել է, որ երկրի  բանակը «ներկայումս աննախադեպ հարվածներ է հասցնում Թեհրանի սրտում գտնվող ռեժիմի թիրախների»։

«Շուտով կհրապարակվեն պատկերներ, որոնք  ցույց կտան վնասի խորությունը», – ասել է նա իր գրասենյակի կողմից տարածված հայտարարության մեջ։

«Իսրայելի թիկունք արձակված յուրաքանչյուր հրթիռի համար իրանցի բռնապետը խստորեն կպատժվի, և հարվածները կշարունակվեն ամբողջ ինտենսիվությամբ։ Մենք կշարունակենք գործել թիկունքը պաշտպանելու և թշնամուն հաղթելու համար, մինչև պատերազմի բոլոր նպատակներին հասնենք», – հավելել է Կացը։

Թարգմանությունը՝ Էմմա Չոբանյանի