Քաղաքականություն
23.06.2025 | 11:20
Իսրայելը գիշերը «հարվածների ալիք է սկսել Իրանի արևմուտքում և մայրաքաղաք Թեհրանում գտնվող ռազմական թիրախների դեմ»։ Այս մասին հայտարարել է իսրայելցի զինվորական պաշտոնյան, գրում է CNN-ը։
Մոտ 20 կործանիչ հարվածներ է հասցրել արևմտյան Քերմանշահ քաղաքի ենթակառուցվածքներին, որոնք, պաշտոնյայի խոսքով, օգտագործվել են հրթիռների պահեստավորման և արձակման, արբանյակային համակարգերի և ռազմական ռադարային օբյեկտների համար։
Պաշտոնյայի խոսքով՝ իսրայելական կործանիչները Թեհրանում նաև հարվածել են «երկիր-օդ» դասի հրթիռային կայանքին։ Իրանի երկնքում խոցվել է մեկ իսրայելական անօդաչու թռչող սարք, սակայն «տեղեկատվական արտահոսքի վտանգ չկա»՝ ըստ Իսրայելի պաշտպանության ուժերի։ Իրանական լրատվամիջոցները հաղորդում են, որ խոցված անօդաչու թռչող սարքը Hermes մոդելի է։
Անցյալ շաբաթ էլ Սպահանի տարածքում խոցվել էր Hermes 900 անօդաչու թռչող սարքը։ Իսրայելական կողմը նշում է, որ Իրանը ևս հարված է հասցրել՝ հրթիռ արձակելով, որը որսացել է Իսրայելի հակաօդային պաշտպանությունը։
Բացի այդ՝ Իսրայելի բանակը հայտնում է, որ ներկայումս հարվածներ է հասցնում Իրանի Քերմանշահ քաղաքում գտնվող ռազմական ենթակառուցվածքներին։
Հաղորդվում է, որ Իսրայելի ռազմաօդային ուժերը այսօր առավոտյան Քերմանշահի տարածքում ավելի քան 15 կործանիչով հարվածներ են հասցրել՝ թիրախավորելով իրանական բալիստիկ հրթիռների արձակման կետերը։ Նշվում է, որ հարվածները ոչնչացրել են Իսրայելին ուղղված բալիստիկ հրթիռների մի քանի պահեստներ և արձակման կետեր։
Թարգմանությունը՝ Էմմա Չոբանյանի
