Արաղչին ազդարարել է Մոսկվայում Պուտինի հետ հանդիպման մասին

Իրանի արտգործնախարար Աբբաս Արաղչին կիրակի՝ հունիսի 22-ին, հայտնել է, որ կեսօրից հետո մեկնելու է Մոսկվա՝ Ռուսաստանի նախագահ Վլադիմիր Պուտինի հետ հանդիպելու։ Միևնույն ժամանակ ՌԴ ԱԳՆ-ն տարածել է հայտարարություն՝ դատապարտելով ԱՄՆ հարվածները Իրանի միջուկային օբյեկտների վրա, փոխանցում է DW-ն։

«Այսօր կեսօրից հետո մեկնում եմ Մոսկվա»,-մեջբերում են Արաղչի խոսքերը AFP-ն և Associated Press-ը։

Նախարարի խոսքով՝ նա նախատեսում է երկուշաբթի՝ հունիսի 23-ին, անցկացնել «լուրջ խորհրդակցություններ Ռուսաստանի նախագահի հետ»․ «Մենք ռազմավարական գործընկերներ ենք, և մշտապես խորհրդակցում ու համադրում ենք մեր դիրքորոշումները»։

Հիշեցնենք՝ Ռուսաստանն ու Իրանը 2025 թվականի հունվարին Մոսկվայում ստորագրել են ռազմավարական գործընկերության մասին պայմանագիր։ Այն պարունակում է կետ, ըստ որի՝ եթե որևէ երրորդ երկիր ռազմական ագրեսիա իրականացնի կողմերից մեկի դեմ, ապա մյուս կողմը պարտավորվում է ոչ մի ձևով չաջակցել ագրեսորին՝ ռազմական կամ այլ օգնությամբ, ինչպես նաև նպաստել հակամարտության կարգավորմանը՝ համաձայն ՄԱԿ-ի կանոնադրության և միջազգային իրավունքի նորմերի։

Հիշեցնենք՝ հունիսի 22-ի գիշերը ԱՄՆ զինված ուժերը օդային հարվածներ են հասցրել Իրանի միջուկային ծրագրի երեք օբյեկտների՝ Ֆորդոյում, Նաթանզում և Սպահան քաղաքում։ Դոնալդ Թրամփը իր ելույթում նշել է, որ Թեհրանի ուրան հարստացնելու հիմնական օբյեկտները ոչնչացվել են։ Իրանի իշխանությունները հաստատել են հարձակումը՝ նշելով, որ այն «երկարաժամկետ հետևանքներ» է ունենալու։