ՌԴ ԱԳՆ-ն դատապարտել է Իրանի մի շարք միջուկային օբյեկտների դեմ իրականացված հարվածները

Ռուսաստանի Դաշնության արտաքին գործերի նախարարությունը հայտարարություն է տարածել Իրանի միջուկային օբյեկտների վրա ամերիկյան հարվածների վերաբերյալ։

«Ռուսաստանը վճռականորեն դատապարտում է հունիսի 22-ի լուսաբացին ԱՄՆ-ի կողմից Իրանի մի շարք միջուկային օբյեկտների դեմ իրականացված հարվածները, որոնք հաջորդել են Իսրայելի հարձակումներին Իսլամական Հանրապետության վրա»,-ասվում է ՌԴ ԱԳՆ մամուլի ծառայության հաղորդագրության մեջ։

Ռուս դիվանագետները նշել են, որ ինքնիշխան պետության տարածքի նկատմամբ հարվածները կոպիտ կերպով խախտում են միջազգային իրավունքը և ՄԱԿ-ի կանոնադրությունը՝ անկախ այն պատճառաբանություններից, որոնք ներկայացվում են։

Հայտարարության մեջ ասվում է՝ հատկապես մտահոգիչ է, որ հարվածները իրականացրել է ՄԱԿ-ի Անվտանգության խորհրդի մշտական անդամ պետությունը։

«Գործողության հետևանքները, այդ թվում՝ ռադիոլոգիական, դեռ պետք է գնահատվեն։ Սակայն արդեն այժմ ակնհայտ է՝ սկսվել է վտանգավոր լարման նոր փուլ, որը կարող է խաթարել թե՛ տարածաշրջանային, և թե՛ գլոբալ անվտանգությունը։ Մերձավոր Արևելքում հակամարտության ընդլայնման վտանգը, որը և այնպես բազմակի ճգնաժամերով է լի, էապես աճել է»,-նշվում է ՌԴ ԱԳՆ հաղորդագրությունում։

Նախարարությունը կոչ է արել ՄԱԳԱՏԷ-ի և ՄԱԿ-ի Անվտանգության խորհրդի ղեկավարությանը արձագանքել կատարվածին․ «Պետք է համատեղ մերժել ԱՄՆ-ի և Իսրայելի հակամարտ գործողությունները։ Կոչ ենք անում դադարեցնել ագրեսիան և ուժեղացնել ջանքերը՝ իրավիճակը քաղաքական և դիվանագիտական հուն վերադարձնելու համար»։

Հիշեցնենք՝ ԱՄՆ նախագահ Դոնալդ Թրամփը ավելի վաղ հայտարարել է, որ ամերիկյան ավիացիան հարվածներ է հասցրել Իրանում գտնվող երեք միջուկային օբյեկտներին՝ Ֆորդոյում, Նաթանզում և Սպահանում։

Ամերիկայի նախագահը նաև ուղերձով է հանդես եկել։ Իր ելույթում, որը տևել է երեք րոպե, Թրամփն ասել է, որ Իրանի ապագան կամ խաղաղություն է, կամ ողբերգություն, և կան բազմաթիվ այլ թիրախներ, որոնք կարող են խոցվել ամերիկացի զինվորականների կողմից: Նա հայտարարել է, որ եթե խաղաղության գործընթացն արագ տեղի չունենա, ապա ԱՄՆ-ն այլ նպատակներ է հետապնդելու՝ ճշգրտությամբ, արագությամբ և հմտությամբ:

ԱՄՆ-ն իր հարվածներով «որոշել է պայթեցնել» Իրանի հետ միջուկային բանակցություններին վերաբերող դիվանագիտությունը, հայտարարել է Իրանի արտգործնախարար Աբբաս Արաղչին՝ մեկնաբանելով ԱՄՆ գիշերային հարվածները Իրանին։

X սոցիալական ցանցում հրապարակած հաղորդագրության մեջ Արաղչին ասել է, որ Իսրայելը տապալել է Թեհրանի և Վաշինգտոնի միջև բանակցությունները՝ հունիսի 13-ին Իրանի միջուկային օբյեկտների վրա իր հարվածներով, իսկ ԱՄՆ-ն նույնը արել է եվրոպական տերությունների հետ բանակցությունների դեպքում՝ կիրակի օրը իրականացրած հարվածներով։

Եվրոպացիների՝ Իրանին բանակցություններին վերադառնալու կոչերին ի պատասխան նա ասել է. «Իրանը ինչպես կարող է վերադառնալ մի բանի, որից երբեք չէր հեռացել»։