Իսրայելը կարող է թիրախավորել Իրանի արտգործնախարար Աբբաս Արաղչիին, որի դեմ վերջերս կատարված դավադրությունը կանխվել է։ Այս մասին հայտարարել է արտգործնախարարի խորհրդական Մոհամմադ Հոսեյն Ռանջբարանը X-ում։
«Այն բանից հետո, երբ հայտարարվեց, որ արտգործնախարարը մեկնում է Ժնև՝ եվրոպական եռյակի հետ բանակցելու, ես բազմաթիվ զանգեր եմ ստացել՝ համոզվելու համար, որ իսրայելական ռեժիմը նրան չի թիրախավորում: Այո, անշուշտ, եղել է և կա նման սպառնալիք: Այնուամենայնիվ, Սեյեդ Աբբաս Արաղչին իրեն ավելի շատ հայրենիքի զինվոր է համարում, քան դիվանագիտական ծառայության ղեկավար»,- գրել է պաշտոնյան՝ հավելելով, որ նրա դեմ օրերս Իսրայելի կողմից դավադրություն է կազմակերպվել․
«Եթե հայրենիքի զինվորների անվտանգության միջոցառումները չլինեին, գուցե մի քանի օր առաջ Թեհրանում իրականացվեր նրա դեմ Իսրայելի մեծ դավադրությունը, որը, փառք Աստծո, ձախողվեց»։
Հավելենք, որ Իրանի արտգործնախարար Աբբաս Արաղչին Ժնևում այսօր հանդիպելու է իր ֆրանսիացի, գերմանացի, բրիտանացի և ԵՄ գործընկերների հետ՝ իրանական միջուկային ծրագիրը քննարկելու համար։
Մեծ Բրիտանիայի արտաքին գործերի նախարար Դեյվիդ Լամմին հինգշաբթի օրը Վաշինգտոնում ԱՄՆ բարձրաստիճան պաշտոնյաների հետ հանդիպումից հետո հայտարարել է, որ «հիմա կա հաջորդ երկու շաբաթվա պատուհան՝ դիվանագիտական լուծման հասնելու համար»։
Պետդեպարտամենտի տվյալներով՝ Լամմին և ԱՄՆ պետքարտուղար Մարկո Ռուբիոն «համաձայնության են եկել, որ Իրանը երբեք չի կարող մշակել կամ ձեռք բերել միջուկային զենք»։
Թարգմանությունը՝ Էմմա Չոբանյանի
