«Տաշիր պիցցա»-ի ևս մի մասնաճյուղի գործունեություն է կասեցվել․ ՍԱՏՄ-ն վստահեցնում է՝ ստուգումները ՍՊԸ-ի դիմումի հիման վրա են

«Պիցցա Տաշիր» ՍՊԸ-ի կողմից Սննդամթերքի անվտանգության տեսչական մարմին ներկայացված դիմումի համաձայն՝ այս պահին վերահսկողություն է իրականացվում այդ կազմակերպությանը պատկանող բոլոր 30 հանրային սննդի կետերում․ հայտնում են ՍԱՏՄ-ից։

Նշվում է, որ ՍԱՏՄ սննդամթերքի անվտանգության վարչության տեսուչների կողմից սանիտարահիգիենիկ նորմերի խախտումներ են հայտնաբերվել «Պիցցա Տաշիր» ՍՊԸ-ի Երևանի Փափազյան 21 հասցեում գործող մասնաճյուղում:

Մասնավորապես՝

-հանրային սննդի կետի պատերը չեն ունեցել հարթ մակերես, պատրաստված չեն եղել անջրանցիկ, չներծծող, լվացվող, ախտահանվող և ոչ թունավոր նյութերից,
– առաստաղները կառուցված չեն եղել այնպես, որ կանխարգելվի կամ նվազեցվի կեղտի կուտակումը, գոլորշու խտացումը և մասնիկների թափվելու հնարավորությունը,
– սննդի կառույցների հատակի մի մասը չի ունեցել հարթ-նորոգ մակերես, եղել է ոչ նորոգ վիճակում,
-սննդամթերքի հետ անմիջական շփման մեջ գտնվող աշխատանքային մակերևույթների մի մասը եղել է ոչ նորոգ, պատրաստված չի եղել հարթ, մաքրվող, կոռոզիայի չենթարկվող, ախտահանվող նյութերից:

«Մասնաճյուղի արտադրական գործունեությունը կասեցվել է, սահմանվել է ժամկետ խախտումները վերացնելու համար»,- ասված է հաղորդագրությունում։

Երեկ տեղեկացրել էինք, որ «Պիցցա Տաշիր» ՍՊԸ-ի 11 մասնաճյուղի գործունեություն է կասեցվել։

Factor.am-ի հարցին՝ արդյո՞ք պլանային են ստուգումները ու երբ են մեկնարկել, ՍԱՏՄ-ից պատասխանել էին․ «Ստուգումներն սկսել են ընկերության դիմումի հիման վրա, մոտ 10-14 օր առաջ»։

Հիշեցնենք, որ ՍՊԸ-ն պատկանում է գործարար Սամվել Կարապետյանին ու նրա անձի շուրջ տեղի ունեցող զարգացումներն այս պահին հանրության ուշադրության կենտրոնում են։ Նրան մեղադրանք է ներկայացվել իշխանությունը զավթելու հրապարակային կոչի հոդվածով։ Կարապետյանը կալանավորվել է: Փաստաբաններն ապօրինի են որակում մեղադրանքը, հայտնում, որ ինքը՝ միլիարդատերը, չի ընդունում մեղադրանքը։