Բաքվում ընթանում է Արցախի ղեկավարների շինծու գործերով նիստը․ ականապատման մասով հարցերի է պատասխանել Դավիթ Մանուկյանը

Բաքվի զինվորական դատարանում ընթանում է Արցախի ղեկավարների ու այլ պաշտոնյաների՝ ընդհանուր 15 անձի նկատմամբ հարուցված շինծու գործերով հերթական դատական նիստը:

Ադրբեջանական լրատվամիջոցների հաղորդմամբ՝ Արցախի ՊՆ հրամանատարի նախկին տեղակալ Դավիթ Մանուկյանը պետական մեղադրողի հարցերին է պատասխանել ականապատման վերաբերյալ։

«Սովորական խաղաղ ժամանակներում, երբ ես զորամասի հրամանատար էի, ականների հետ կապված միջադեպեր էին լինում (նկատի ունենալով ականների տեղադրումը): Չնայած այդքան մեծ մասշտաբով չէին, սակայն  տեղի էին ունենում: Շատ հստակ հրահանգներ էին տրվում ձևաթղթերի և քարտեզների պահպանման վերաբերյալ: Ականների տեղադրման յուրաքանչյուր գործողությունից առաջ բարձրագույն հրամանատարությունը հրաման է տալիս»,- ասել է Մանուկյանը։

Նրա խոսքով՝ հրամանում հստակ նշված է եղել, թե ինչ քանակությամբ պետք է պատրաստվեին ձևաթղթերի, քարտեզների և դիագրամների պատճեններ։ Մանուկյանն այնուհետև ասել է. «Այնտեղ հասցեները նշվում են, որպեսզի մենք իմանանք, թե ինչ և որտեղ ուղարկել։ Մենք նաև գործել ենք հրամանում նշված կետերին համապատասխան»։

Հիշեցնենք, որ հունիսի 13-ին տեղի ունեցած նախորդ նիստում ևս հարցաքննվել էր Արցախի ՊԲ նախկին հրամանատար Լևոն Մնացականյանը։ Ցուցադրվել էր նաև Շոշի միջնակարգ դպրոցում 44-օրյա պատերազմի ժամանակ զինծառայողների հանդիպման տեսագրությունը, որտեղ ելույթ ունենալով՝ Սամվել Բաբայանը, իբր, հրահանգներ է տալիս զինվորականներին և բացատրում Շուշիում հակառակորդին շրջապատելու առաջիկա գործողության ծրագիրը։

Թարգմանությունը՝ Էմմա Չոբանյանի