Դատապարտում ենք Սյունիքի մարզում և Երևանում տեղի ունեցած դաժան բռնությունները՝ ուղղված կնոջ և նրա եղբոր նկատմամբ․ Ընդդեմ կանանց նկատմամբ բռնության կոալիցիա

Ընդդեմ կանանց նկատմամբ բռնության կոալիցիան հայտարարություն է տարածել՝ կապված Սյունիքի մարզի Տաթև համայնքի նախկին ղեկավար Վարուժան Մարտիրոսյանի երկու երեխաներին ծեծի ենթարկելու առնչությամբ։

Հայտարարությունը՝ ստորև․

«Ընդդեմ կանանց նկատմամբ բռնության կոալիցիան խորը մտահոգությամբ է արձագանքում հունիսի 17-ին Սյունիքի մարզում և Երևանում տեղի ունեցած խիստ անթույլատրելի դեպքին, երբ, ըստ հաղորդման, Սյունիքի մարզի գյուղապետերից մեկի կողմից դաժան ծեծի է ենթարկվել 34-ամյա կին Մ. Մ.-ն, իսկ նրան ուղեկցող եղբայրը՝ 39-ամյա Կ. Մ.-ն, հետագայում հարձակման է ենթարկվել Երևանում՝ Խաղաղ Դոնի փողոցում, մի խումբ անձանց կողմից։

Այս դեպքը ոչ միայն ծայրահեղ դաժանություն է, այլ նաև խորը մտահոգություն է առաջացնում՝ կապված պետական պաշտոնյաների կողմից հնարավոր իշխանության չարաշահման, ինչպես նաև կանանց նկատմամբ շարունակական բռնությունների հանդուրժման և անպատժելիության հետ։ Տեղեկությունները, ըստ որոնց՝ բռնության գործողությունները կազմակերպվել են Տաթև գյուղի վարչական ղեկավար Գոռ Մինասյանի կողմից, պահանջում են անհապաղ և թափանցիկ հետաքննություն։

Մենք խստորեն դատապարտում ենք այս դաժան և արժանապատվությունը ոտնահարող արարքները՝ անկախ դրանց իրականացնողի սոցիալական դիրքից կամ պաշտոնեական կարգավիճակից։ Բռնությունը երբեք չի կարող արդարացվել, իսկ պաշտոնեական դիրքը չպետք է ծառայի որպես հարթակ՝ անձնական հաշիվներ լուծելու համար։
Կոալիցիան կոչ է անում ՀՀ իրավապահ մարմիններին՝
– իրականացնել արդար, անաչառ և լիարժեք քննություն,
– պատասխանատվության ենթարկել մեղավոր անձանց՝ անկախ նրանց պաշտոնական կամ քաղաքական կարգավիճակից,
– ապահովել զոհերի լիարժեք պաշտպանություն և աջակցություն՝ մասնավորապես հաշվի առնելով նրանց ծայրահեղ ծանր վիճակը։

Մենք մեր զորակցությունն ենք հայտնում Մ.Մ.-ի և Կ.Մ.-ի ընտանիքին, և վերահաստատում ենք մեր հանձնառությունը՝ պայքարելու բռնության բոլոր ձևերի դեմ և պաշտպանելու յուրաքանչյուր կնոջ՝ արժանապատվորեն ապրելու և պաշտպանված լինելու իրավունքը»։

«Ծեծ չի եղել է, սպանության փորձ են արել։ Եկել սպանում էին, բայց բախտի բերմամբ սաղ ա մնացել»,- Factor TV-ին ասել էր Վարուժան Մարտիրոսյանը՝ նկարագրելով երեկ առավոտյան իր երկու երեխաների հետ տեղի ունեցած միջադեպը։