Քաղաքականություն
18.06.2025 | 19:47
Իրանի նախագահ Մասուդ Փեզեշքիանը հայտարարել է, որ «Իսրայելի ռեժիմը անտեսում է միջազգայնորեն ընդունված բոլոր կանոնակարգերը»՝ զգուշացնելով, որ «տարածաշրջանը կարող է երբեք չտեսնել կայուն խաղաղություն և անվտանգություն, եթե Իսրայելի հանցագործությունները շարունակվեն», փոխանցում է IRNA գործակալությունը։
Երեքշաբթի օրը ԱՄԷ նախագահ Մոհամեդ բին Զայեդ Ալ Նահյանի հետ հեռախոսազրույցի ժամանակ նա ասել է, որ ի սկզբանե ձգտել է միասնության և համերաշխության՝ թե՛ երկրի ներսում, թե՛ այլ երկրների հետ համագործակցության մեջ։
Այնուամենայնիվ, Իրանի նախագահն ասել է, որ Թեհրանում ՀԱՄԱՍ-ի առաջնորդ Իսմայիլ Հանիեի սպանությամբ «Իսրայելի ռեժիմը փորձել է խոչընդոտել Իրանի խաղաղության ջանքերը»։
Նա նաև անդրադարձել է Իրանի դեմ Իսրայելի կողմից շարունակվող ագրեսիային, որը, նրա խոսքով սկսվել է այն ժամանակ, երբ Թեհրանը բանակցություններ էր վարում ԱՄՆ-ի հետ՝ աշխարհին վստահեցնելու, որ իր միջուկային ծրագիրը բացառապես խաղաղ բնույթ է կրում: Նա դատապարտել է հարձակումները որպես այդ դիվանագիտական ջանքերը խոչընդոտելու փորձ:
Իր հերթին, էմիրաթական կողմը համերաշխություն է հայտնել Իրանի կառավարությանը և ժողովրդին:
Հիշեցնենք, որ Իսրայելը հունիսի 13-ին հարձակում է սկսել Իրանի վրա՝ թիրախավորելով միջուկային օբյեկտները, ռազմական և էներգետիկ ենթակառուցվածքները: Հարվածների հետևանքով զոհվել են բարձրաստիճան զինվորականներ, միջուկային գիտնականներ և խաղաղ բնակիչներ։ Ի պատասխան՝ Իրանը հարվածներ է հասցնում Իսրայելի տարածքին:
Թարգմանությունը՝ Էմմա Չոբանյանի
