05.10.2026 | 23:19
Փաշինյանը նոր նշանակումներ է արել
Ոստիկանի կողմից լրագրող Մերի Մանուկանին հարվածելու դեպքով վարույթ նախաձեռնված չէ
Հասարակություն
16.06.2025 | 14:10
24news.am կայքի լրագրող Մերի Մանուկյանի նկատմամբ ոստիկանի կողմից բռնության դեպքով այս պահին վարույթ նախաձեռնված չէ։ Քննչական կոմիտեից Factor TV-ի հարցին ի պատասխան հայտնեցին, որ դեպքի առթիվ հաղորդում չեն ստացել։
Հարցին՝ արդյոք Դատախազությունն ուսումնասիրե՞լ է մամուլի հրապարակումները՝ վարույթ հարուցելու հարցը որոշելու համար, Դատախազությունից Factor TV-ին պատասխանեցին, որ գրավոր դիմենք։
Հիշեցնենք, որ այսօր առավոտյան քասախցիները փակել էին Երևան-Աշտարակ ճանապարհը՝ պահանջելով վերականգնել 59 համարի ավտոբուսի երթուղին։
Լրագրողի նկատմամբ բռնություն, 11 բերման ենթարկված անձ. Քասախում ոստիկաններն ուժով բացել են ճանապարհը
Բողոքի ակցիայի ընթացքում քաղաքացիներ բերման ենթարկվեցին։ Լրագրող Մերի Մանուկյանը, որն աշխատում էր տեղում, ոստիկաններից մեկին հարց է ուղղում, թե ինչու է բերման ենթարկելիս քաղաքացիների նկատմամբ բռնություն գործադրում։
«Դու ի՞նչ ես ուզում, դու ի՞նչ ես ուզում, դիմե՛ք լրատվական ծառայություն»,- բղավում է ոստիկանը, ապա պահանջում լրագրողից՝ չխոչընդոտել իրեն։ Մերի Մանուկյանը պահանջում է իր հետ հանգիստ խոսել։ Շուտով ոստիկաններն իրենց գործընկերոջը հեռացնում են լրագրողի մոտից։ Լրագրողը փսրձում է այլ ոստիկաններից պահանջել, որ իր վրա բղավող ծառայողին հեռացնեն տարածքից, ինչից հետո բղավող ոստիկանը հարվածում է Մերի Մանուկյանին։
Այս միջադեպից հետո լրագրողին հարվածած ոստիկանն ազատվել է Ոստիկանությունում ծառայությունից, սակայն ոստիկանի վերը նշված պահվածքը միայն կարգապահական խախտում չէ։
Քրեական օրենսգրքի 237-րդ հոդվածով սահմանվում է լրագրողի մասնագիտական օրինական գործունեությանը խոչընդոտելը։
Տվյալ դեպքում ոստիկանի արարքը առերևույթ համապատասխանում է 237-րդ հոդվածի 3-րդ մասի հատկանիշներին, այն է՝ լրագրողին տեղեկություն տարածելուն կամ տարածելուց հրաժարվելուն հարկադրելը կամ նրա մասնագիտական օրինական գործունեությունն այլ կերպ խոչընդոտելը, որը կատարվել է լրագրողի նկատմամբ բռնություն գործադրելով։
Օրենսգրքի հիմնական հասկացություններում բռնությունը բացատրվում է որպես այլ մարդու նկատմամբ նրա կամքին հակառակ կամ կամքն անտեսելով, դիտավորյալ ֆիզիկական ներգործություն գործադրելը կամ այդ եղանակով նրան ֆիզիկական վնաս պատճառելը, այսինքն՝ ոստիկանի կողմից ցանկացած ֆիզիկական ներգործություն արդեն իսկ պետք է դիտարկել որպես բռնություն։
Ընդ որում՝ անգամ այն դեպքում, երբ լրագրողն անձամբ հաղորդում չներկայացնի, մամուլի հրապարակումը կարող է հիմք լինել՝ քրեական վարույթ հարուցելու համար։
Արաքս Մամուլան
