14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Լրագրողի նկատմամբ բռնություն, 11 բերման ենթարկված անձ. Քասախում ոստիկաններն ուժով բացել են ճանապարհը
Հասարակություն
16.06.2025 | 11:02
Այսօր վաղ առավոտից քասախցիները կրկին բողոքի ակցիա են իրականացնում և պահանջում, որ 59 համարի ավտոբուսը շարունակի աշխատել նախկին երթուղով և հասնի մինչև իրենց գյուղ։ Գյուղացիները փորձեցին փակել Երևան-Աշտարակ ճանապարհը, սակայն ոստիկանները բռնի ուժ գործադրելով սկսեցին բերման ենթարկել նրանց։ Ինչպես FactorTV-ի հետ զրույցում նշեց ՆԳՆ մամուլի քարտուղարը՝ ոստիկանի օրինական պահանջները չկատարելու համար բերման է ենթարկվել 11 քաղաքացի։
Կարմիր բերետավորներից մեկն այդ ընթացքում հարվածեց ակցիան լուսաբանող 24news-ի լրագրող Մերի Մանուկյանին։ ՆԳՆ-ից տեղեկացրին, որ այս մասով ծառայողական քննություն է նշանակվել։
Հիշեցնենք՝ արդեն մի քանի ամիս է Քասախ և Պռոշյան համայնքի բնակիչները պարբերաբար բողոքի ակցիաներ են իրականացնում։ Նրանք պահանջում են, որ Տարածքային կառավարման և ենթակառուցվածքների նախարարությունը չեղյալ հայտարարի որոշումը, ըստ որի` Պռոշյան-Երևան ուղևորափոխադրումը պետք է իրականացվի «ՄուլտիՏրանսպորտ» ՍՊԸ-ին պատկանող թիվ 277 միկրոավտոբուսով, որի արժեքը 200 դրամ է։ Բնակիչները դժգոհ են ոչ միայն գնաի բարձրացումից, այլև նրանից, որ ստիպված են երկար ճանապարհ կտրել իրենց բնակավայր հասնելու համար։ Ապրիլի 9-ին հարցի քննարկման նպատակով հանդիպում էր կազմակերպվել, որին մասնակցել են վարչապետի աշխատակազմից, ՏԿԵՆ-ի տրանսպորտի վարչությունից և Երևանի քաղաքապետարանից ներկայացուցիչներ: Քննարկման արդյունքում պռոշյանցիների գիծը՝ 25 համարի երթուղին, շարունակում է իր աշխատանքը, իսկ 59 համարի երթուղին՝ ոչ:
Հանդիպումից հետո, փաստացի, քասախցիների պահանջը չբավարարվեց, ուստի նրանք շարունակում են ակցիաներ իրականացնել՝ պահանջելով 59 համարի երթուղու աշխատանքը ևս վերականգնել:
Ռոզա Վարդանյան
