«Գիշերը շատ ծանր էր, հարվածներ են հասցվել մի քանի քաղաքների, հրթիռները ամբողջությամբ հնարավոր չէր խոցել»,- Factor.am-ի հետ զրույցում հայտնեց Իսրայելահայերի միության նախագահ Արտյոմ Չեռնամորյանը:
Նրա խոսքով` այս գիշեր բավական զոհեր են եղել, հիմա թիվ է ճշտվում։
«Բալիստիկ հրթիռները Րեխովոտ ու Բաթ Յամ քաղաքների վրա են ընկել, երկու քաղաքներում էլ հայկական ընտանիքիներ շատ կան։ Հայերի հետ առավոտյան խոսել ենք, Բաթ Յամում ապրող մի ընտանիքից դեռ տեղեկություններ չունենք»,- նշեց Իսրայելահայերի միության նախագահը։ Չեռնամորյանը հավելեց` հայերի շրջանում տուժածների մասին դեռևս ոչինչ հայտնի չէ։
Հիշեցնենք՝ Իսրայելը սկսել է հարվածներ հասցնել Իրանին հունիսի 13-ին։ Սկզբում Իսրայելի զինված ուժերը հարվածել են Իրանի միջուկային օբյեկտներին, հակաօդային պաշտպանության համակարգերին և ռազմական օբյեկտներին։ Սակայն հունիսի 14-ին Իսրայելը սկսել է թիրախավորել էներգետիկ արդյունաբերությունը։
The New York Times-ը գրում է, որ իսրայելական զինվորականների տվյալներով՝ երկու օրվա ընթացքում Իսրայելը շուրջ 150 հարված է հասցրել Իրանին, իսկ Իրանի զինված ուժերը Իսրայել են արձակել ավելի քան 200 բալիստիկ հրթիռ և տասնյակ անօդաչու թռչող սարքեր։
Իրանը հայտարարել է, որ հունիսի 13-ին Իսրայելի հարվածների արդյունքում զոհվել է 78 մարդ, իսկ հունիսի 14-ին՝ ևս տասնյակ մարդիկ, այդ թվում առնվազն 60 մարդ, երբ հրթիռը հարվածել է Թեհրանում գտնվող 14-հարկանի բնակելի շենքին, փոխանցում է Reuters-ը։ Իսրայելում Իրանի հարվածների հետևանքով զոհվել է առնվազն 11 մարդ, որոնցից մեծամասնությունը՝ հունիսի 15-ի գիշերը։
Անի Թամրազյան
