Իսրայելը հարվածել է Իրանի պաշտպանության նախարարության շենքին և Թեհրանի գլխավոր նավթապահեստին

Իսրայելական կործանիչները հունիսի 15-ի գիշերը ավիահարված են հասցրել Թեհրանի Շահրան նավթապահեստին և Իրանի պաշտպանության նախարարության շենքին, հայտնում է Tasnim գործակալությունը։

Հարվածի հիմնական նպատակը եղել է Պաշտպանության նախարարության շտաբը։ Ինչպես հայտնել է գործակալության թղթակիցը, նախարարության գրասենյակային շենքերից մեկը ստացել է թեթև վնասներ։

Բացի այդ, The New York Times-ի տվյալներով՝ իսրայելական հարվածի հետևանքով հրդեհ է բռնկվել Շահրանի նավթապահեստում՝ Թեհրանի գլխավոր վառելիքային պահեստում։ Tasnim-ը գրում է, որ հարվածից հետո վառվել են վառելիքի պահեստավորման երկու ռեզերվուարներ։ Հրդեհը մարվել է։

Նշվել է նաև, որ հրդեհ է բռնկվել Թեհրանի նավթավերամշակման գործարանում, սակայն Իրանի իշխանությունները հերքում են այս տեղեկությունը։

Հիշեցնենք՝ Իսրայելը սկսել է հարվածներ հասցնել Իրանին հունիսի 13-ին։ Սկզբում Իսրայելի զինված ուժերը հարվածել են Իրանի միջուկային օբյեկտներին, հակաօդային պաշտպանության համակարգերին և ռազմական օբյեկտներին։ Սակայն հունիսի 14-ին Իսրայելը սկսել է թիրախավորել էներգետիկ արդյունաբերությունը։

The New York Times-ը գրում է, որ իսրայելական զինվորականների տվյալներով՝ երկու օրվա ընթացքում Իսրայելը շուրջ 150 հարված է հասցրել Իրանին, իսկ Իրանի զինված ուժերը Իսրայել են արձակել ավելի քան 200 բալիստիկ հրթիռ և տասնյակ անօդաչու թռչող սարքեր։

Իրանը հայտարարել է, որ հունիսի 13-ին Իսրայելի հարվածների արդյունքում զոհվել է 78 մարդ, իսկ հունիսի 14-ին՝ ևս տասնյակ մարդիկ, այդ թվում առնվազն 60 մարդ, երբ հրթիռը հարվածել է Թեհրանում գտնվող 14-հարկանի բնակելի շենքին, փոխանցում է Reuters-ը։ Իսրայելում Իրանի հարվածների հետևանքով զոհվել է առնվազն 11 մարդ, որոնցից մեծամասնությունը՝ հունիսի 15-ի գիշերը։