Հայերը հայտնվել են Բաքվի օդանավակայանում, ադրբեջանցիները՝ Երևանի․ ԱԱԾ հայտարարությունը

Իրանի Իսլամական Հանրապետության և հարակից որոշ երկրների օդային տարածքների փակմամբ պայմանավորված՝ մի շարք միջազգային ավիաթռիչքներ հարկադրված վայրէջքներ են կատարել «Զվարթնոց» միջազգային օդանավակայանում և տարածաշրջանի այլ երկրների օդանավակայաններում։ Այս մասին հայտնել է ՀՀ ազգային անվտանգության ծառայությունը։

«Այս հանգամանքի բերումով ՀՀ քաղաքացիներ և ազգությամբ հայեր հայտնվել են Ադրբեջանի մայրաքաղաք Բաքվի օդանավակայանում։ Միևնույն ժամանակ, նույն իրավիճակով պայմանավորված, Ադրբեջանի քաղաքացիներ հայտնվել են «Զվարթնոց» օդանավակայանում։ Հայտնում ենք, որ ստեղծված իրավիճակով պայմանավորված ՀՀ պետական կառույցները իրականացնում են հետևողական աշխատանք»,- գրված է ԱԱԾ հաղորդագրության մեջ:

Ավելի վաղ հայտնել էինք, որ տարածաշրջանում ստեղծված լարվածության պայմաններում չեղարկվել են դեպի Իսրայել, Իրան և Միացյալ Արաբական Էմիրություններ ու հակառակ ուղղություններ չվերթները։ Քաղավիացիայի կոմիտեից Factor.am-ին հայտնել էին, որ չեղարկված չվերթների կարգավիճակը չի փոխվել, հստակ չէ, թե դրանք երբ կվերականգնվեն։

Կոմիտեից նաև փոխանցել են, որ Իրանի օդային տարածքի փակվելու պատճառով «Զվարթնոց» օդանավակայանում վայրէջք են կատարել Բելգորոդ-Դուբայ, Մինվոդի-Դուբայ, Կազան-Շարժա չվերթները։

Հիշեցնենք, որ Իսրայելի ռազմաօդային ուժերը հունիսի լույս 13-ի գիշերը հարվածել են Իրանի տարածքին, որից հետո Իսրայելը փակել է իր օդային տարածքը: Իսրայելի  բանակի տվյալներով՝ հարվածները հասցվել են Իրանում միջուկային ծրագրի և այլ ռազմական օբյեկտների հետ կապված տասնյակ թիրախների։ Իսրայելական  բանակը հայտնել է, որ գիշերը հարվածներ են հասցվել Իրանում ավելի քան 100 թիրախների: Գործողությանը մասնակցել է 200 կործանիչ: Հաղորդվում է, որ զոհվել է Իրանի ԶՈՒ-ի երեք բարձրաստիճան հրամանատար, ինչպես նաև 6 միջուկային գիտնական: