15.07.2026 | 00:59
ԱԱ-2026․ Իսպանիան հաղթեց Ֆրանսիային և դուրս եկավ եզրափակիչ․ ՏԵՍԱՆՅՈՒԹ
Չեղարկված չվերթների կարգավիճակը չի փոխվել․ Քաղավիացիայի կոմիտեն՝ ներկա իրավիճակի մասին
13.06.2025 | 17:16
Չեղարկված չվերթների կարգավիճակը չի փոխվել, հստակ չէ, թե Իրանից, Իսրայելից և ԱՄԷ-ից դեպի Երևան ու հակառակ ուղղություններով թռիչքները երբ կվերականգնվեն։ Տեղեկությունը Factor.am-ի հետ զրույցում փոխանցել է Քաղավիացիայի կոմիտեի մամուլի պատասխանատու Լիլիթ Աղաբեկյանը։
«Իրանի օդային տարածքի փակվելու պատճառով «Զվարթնոց» օդանավակայանում վայրէջք են կատարել Բելգորոդ-Դուբայ, Մինվոդի-Դուբայ, Կազան-Շարժա չվերթները»,- հավելեց Աղաբեկյանը։
Ավելի վաղ օդանավակայանի չվացուցակից տեղեկացել էինք, որ տարածաշրջանում ստեղծված լարվածության պայմաններում չեղարկվել են դեպի Իսրայել, Իրան և Միացյալ Արաբական Էմիրություններ ու հակառակ ուղղություններ չվերթները։
Հիշեցնենք, որ Իսրայելի ռազմաօդային ուժերը հունիսի լույս 13-ի գիշերը հարվածել են Իրանի տարածքին, որից հետո Իսրայելը փակել է իր օդային տարածքը: Իսրայելի բանակի տվյալներով՝ հարվածները հասցվել են Իրանում միջուկային ծրագրի և այլ ռազմական օբյեկտների հետ կապված տասնյակ թիրախների։ Իսրայելական բանակը հայտնել է, որ գիշերը հարվածներ են հասցվել Իրանում ավելի քան 100 թիրախների: Գործողությանը մասնակցել է 200 կործանիչ: Հաղորդվում է, որ զոհվել է Իրանի ԶՈՒ-ի երեք բարձրաստիճան հրամանատար, ինչպես նաև 6 միջուկային գիտնական:
Անի Թամրազյան
