Իրանի օրինական և հզոր արձագանքը թշնամուն կստիպի զղջալ իր գործողությունների համար․ Փեզեշքիանը՝ Իսրայելի հարձակման մասին

Իրանական ազգը և երկրի պաշտոնյաները չեն լռելու այս հանցագործության առջև, Իրանի Իսլամական Հանրապետության օրինական և հզոր արձագանքը կստիպի թշնամուն զղջալ իր անմիտ գործողությունների համար։ Այս մասին հայտարարել է Իրանի նախագահ Մասուդ Փեզեշքիանը՝ անդրադառնալով երկրի դեմ Իսրայելի հարձակմանը, գրում է Mehr-ը։

Ըստ նրա՝ «Իսրայելի ագրեսիան բոլոր միջազգային պարտավորությունների խախտում է և միջազգային ասպարեզում ցույց է տալիս մանկասպան և ագրեսիվ սիոնիստական ​​ռեժիմի վայրենի և հանցավոր բնույթը»։

«Ինչպես Իսլամական Հանրապետությունը բոլոր ջանքերը գործադրել է աշխարհում և տարածաշրջանում խաղաղության ու անդորրության հասնելու համար և ապացուցել է իր լիակատար պատրաստակամությունը երկարատև երկխոսության և խաղաղության ուղղությամբ աշխարհի հետ վստահության ամրապնդման համար, այս անգամ ևս վճռական կգործի ագրեսիային ի պատասխան և երկրի տարածքային ամբողջականության օրինական պաշտպանության համար»,- ասել է Իրանի նախագահը։

Նա նշել է, որ Իրանի ժողովուրդը այս դժվարին ժամանակաշրջանը, ինչպես անցյալում, կանցնի՝ իր միասնությունը պահպանելով։

Հիշեցնենք, որ Իսրայելի ռազմաօդային ուժերը հունիսի լույս 13-ի գիշերը հարվածել են Իրանի տարածքին, որից հետո Իսրայելը փակել է իր օդային տարածքը: Իսրայելի բանակի տվյալներով՝ հարվածները հասցվել են Իրանում միջուկային ծրագրի և այլ ռազմական օբյեկտների հետ կապված տասնյակ թիրախների։ Ըստ իսրայելական կողմի՝ գիշերը հարվածներ են հասցվել Իրանում ավելի քան 100 թիրախների: Գործողությանը մասնակցել է 200 կործանիչ: Իսրայելը գործողությունն անվանել է «Առյուծի վերելք»։

Թարգմանությունը՝ Էմմա Չոբանյանի