Իրանը կշարունակի ուրանի հարստացումը. Փեզեշքիանն արձագանքել է Թեհրանի դեմ ՄԱԳԱՏԷ-ի բանաձևին

ՄԱԳԱՏԷ-ի «Կառավարիչների խորհրդի որոշումը վնասակար էր»։ Այս մասին հայտարարել է Իրանի նախագահ Մասուդ Փեզեշքիանը՝ հավելելով, որ Իրանը կշարունակի ուրանի հարստացումը։

Նա վերահաստատել է Իրանի վճռականությունը՝ շարունակելու իր միջուկային գործունեությունը՝ ասելով, որ երկիրը չի հրաժարվի ուրանի հարստացման իր իրավունքից՝ չնայած աճող ճնշմանը։ Հանրային միջոցառման ժամանակ ելույթ ունենալով՝ Փեզեշքիանը հարգանքի տուրք է մատուցել Իրանի միջուկային նահատակների հիշատակին։

«Մենք կշարունակենք մեր ուղին։ Հարստացումը կշարունակվի, և մենք չենք նահանջի ներկայիս միտումից։ Նույնիսկ եթե նրանք ռմբակոծեն մեր օբյեկտները, մեր կարողությունները մեր մտքում են։ Ինչ էլ նրանք ոչնչացնեն, մենք կվերականգնենք»,- ասել է նա՝ ընդգծելով, որ Իրանի միջուկային գիտելիքները խորը արմատներ ունեն և չեն կարող վերացվել ռազմական գործողություններով։

Իրանի ատոմային էներգիայի կազմակերպության (ԻԱԷԿ) խոսնակ Բեհրուզ Ղամալվանդին նույնպես խստորեն քննադատել է Ատոմային էներգիայի միջազգային գործակալության ընդունած բանաձևը՝ այն անվանելով Արևմուտքի կողմից ռազմավարական սխալ հաշվարկ։

«Նրանք սխալմամբ կարծում են, որ քաղաքական ճնշումը կարող է ստիպել Իրանին նահանջել իր օրինական դիրքորոշումներից։ Մենք արդեն զգուշացրել էինք, որ համապատասխանաբար կհարմարեցնենք մեր գործողությունները»,- ասել է նա։

Իրանի պատասխանի շրջանակում նա հայտարարել է երրորդ հարստացման համալիրի ակտիվացման, ինչպես նաև Իրանի ցենտրիֆուգային համակարգերի խոշոր արդիականացման մասին։

«Մենք մեր առաջին սերնդի ցենտրիֆուգները կփոխարինենք վեցերորդ սերնդի մեքենաներով»,- նշել է նա՝ հավելելով, որ ուրանի հարստացումը զգալիորեն կաճի թե՛ ծավալով, թե՛ արդյունավետությամբ։

Հիշեցնենք՝ Ատոմային էներգիայի միջազգային գործակալության (ՄԱԳԱՏԷ) կառավարիչների խորհուրդն այսօր բանաձև է ընդունել, որով դատապարտում է Իրանի կողմից իր պարտավորությունների «չկատարումը»։

Թարգմանությունը՝ Էմմա Չոբանյանի