«Գույք եք ունեցել, տեղյակ չե՞ք եղել»․ «Փաստորեն, տենց ա ստացվում»․ Վ․ Հովհաննիսյանը՝ հայտարարագրի մասին․ ՏԵՍԱՆՅՈՒԹ

Factor TV– ն այսօր Ֆինանսների նախարար Վահե Հովհաննիսյանից հետաքրքրվեց, թե ինչու է նրա եկամուտների հայտարարագիրը լրացված թերություններով։  Հիշեցնենք՝ նախարարն իր վերջին հայտարարագրում նշել է հողատարածքի վաճառքի մասին, որը երբեք չի հայտարարագրել, բացի այդ հայտարարագրում նշում կա դեռևս 2004-ին ձեռք բերված բնակարանի մասին։ Վահե Հովհաննիսյանին հարց ուղղեցինք՝ ինչո՞ւ նախկինում այս երկու գույքերը իր հայտարարագրում չեն եղել։ Նա հետևյալ պարզաբանումը ներկայացրեց։

«Ես, որ նշել եմ էն հողատարածքը, որն ունեմ, որից մի հատված առանձնացրել և վաճառել եմ։ Դա առանձին գույք չի եղել, մի հողատարածքի մեջ է եղել, առանձնացվել վաճառվել է, հետևաբար՝ առանձին ներկայացված չի եղել։ Ինչ վերաբերում է բնակարանին, որը ես հայտարարագրել եմ, դա այն բնակարանն է, որտեղ ես ծնվել եմ և այդ տանը գրանցվել եմ օրենքի ուժով։ Այդ տանը դարձել եմ համասեփականատեր, որտեղ գրանցված եմ եղել։ Կոռուպցիայի կանխարգելման հանձնաժողովն ինձ նամակ էր գրել, որ Կադաստրում նայել են, տեսել են, որ ես համասեփականատեր եմ, պարզաբանումներ են ուզել։ Ես այդ ժամանակ նոր իմացա, որ բնակարանի համասեփականատեր եմ»,-ասաց նախարարը։

Հիշեցնենք, որ Վերաքննիչ հակակոռուպցիոն դատարանը 2025-ի ապրիլին պարտավորեցրել է Հակակոռուպցիոն կոմիտեին քրեական վարույթ նախաձեռնել՝ Վահե Հովհաննիսյանի հայտարարագրերում կոռուպցիոն ռիսկ պարունակող արարքների առնչությամբ, սակայն ՀՀ դատախազությունը բողոքարկել է Վերաքննիչ հակակոռուպցիոն դատարանի այդ որոշումը։ Թե ինչ կորոշի Վճռաբեկ դատարանի հակակոռուպցիոն պալատը, պարզ կդառնա առաջիկայում։

Մանրամասները՝ տեսանյութում։

Նարեկ Կիրակոսյան