30 տրոլեյբուսի փոխարեն՝ փոխադարձ մեղադրանքներ

Այսօր հայտնի դարձավ, որ Երևանի քաղաքապետարանը չի կարողանա ձեռք բերել տարեսկզբին խոստացված 45 տրոլեյբուսներից առնվազն 30-ը։ Երևանի քաղաքապետի մամուլի քարտուղար Հայկ Կոստանյանն այսօրվա բրիֆինգի ժամանակ սա բացատրեց հանրային տրանսպորտի ուղեվարձի թերհավաքագրումներով։

Երևանի ավագանու «Մայր Հայաստան» խմբակցության ղեկավար Մանուկ Սուքիասյանը Factor.am-ի հետ զրույցում պնդեց՝ քաղաքային իշխանությունը, մեղադրելով ընդդիմությանն ու ուղեվարձը չվճարողներին, փորձում է խուսափել պատասխանատվությունից։

«Եթե այդ հավաքագրումները լինեին 100, ոչ թե 150 դրամով, նման գումարային խնդիր հաստատապես չէր առաջանա։ Սա քաղաքային իշխանության հերթական տապալման մասին է խոսում,  հնարավոր չէ թվերն այս պարագայում կեղծել, իրենք դա խոստովանում են՝ փորձ անելով խուսափել պատասխանատվությունից։ Սա անլուրջ է, քաղաքի կառավարման պատասխանատուն իրենք են»,- ընդգծեց ավագանու ընդդիմադիր անդամը։

Փետրվարի 1-ից, երբ Երևանում թանկացավ հասարակական տրանսպորտի սակագինը, ընդդիմադիրները՝ այդ թվում ավագանու «Մայր Հայաստան» խմբակցության անդամները, ակցիաներ էին իրականացնում ավտոբուսներում, քաղաքացիներին հորդորում չվճարել նոր սակագնով։ Ըստ Կոստանյանի՝ սա է պատճառը, որ տրոլեյբուսների գնման գործընթացը ձախողվել է։

«Փետրվարից ընդդիմադիր գործընկերների ջանքերով հասարակական տրանսպորտում ստեղծվեց անհասականալի և ինչ-որ չափով նաև անկառավարելի վիճակ, որը բերեց հասցրեց մի կետի, որ արդեն ներկայիս 5 ամիսների ընթացքում Երևանի քաղաքապետարանի կողմից ընդհանուր հաշվով հավաքագրվել է շուրջ 6 մլրդ 30 մլն դրամ։ Բանից պարզվում է, որ 45 տրոլեյբուսներից առնվազն 30-ը արդեն հնարավոր չի լինի գնել։ Թերհավաքագրումները բերել են նրան, որ այդ գումարը չկա, և 30 տրոլեյբուս արդեն դուրս է եկել ցանկից»,- քաղաքապետարանում բրֆինգի ժամանակ հայտարարեց Հայկ Կոստանյանը։

Մանուկ Սուքիասյանն ընդգծում է՝ եթե ընդունեին, որ ուղեվարձի բոյկոտն ունի հանրային լայն աջակցություն և ընդառաջ գնային քաղաքացիների պահանջին՝ ուղեվարձի գինը կրկին 100 դրամ սահմանելով, ավելի շատ գումար կհավաքագրվեր, քան հավաքագրվել է հիմա։

«Քաղաքային տրանսպորտային համակարգի ռեֆորմը տապալել են և հանգուցալուծումը մեկն է՝ արտահերթ ընտրություններ»,- եզրափակեց Սուքիասյանը։ 

Ի դեպ, Հայկ Կոստանյանն այսօր նաև հայտարարեց, որ եթե հավաքագրումները շարունակվեն նույն տեմպերով, ապա չի բացառվում, որ Երևանի քաղաքապետարանը մնացած 15 տրոլեյբուսները ևս չկարողանա ձեռք բերել: 

Ըստ քաղաքապետի մամուլի քարտուղարի՝ այս ամենի մեղավորը ընդդիմությունն է, իսկ իրենք չեն պատրաստվում այլ ոլորտից գումար «կտրել» և բերել տրանսպորտի ոլորտ, որպեսզի խոստացված տրոլեյբուսները կարողանան գնել։

Արփի Հակոբյան