Հասարակություն
30.05.2025 | 17:30
ՀՀ վարչապետ Նիկոլ Փաշինյանը նոր բնակարան կունենա Երևանում։ Անցած տարի նա 49․3 մլն դրամ փոխառություն է տվել «Իջևանատուն» ՓԲԸ-ին՝ բնակարանի գնման իրավունքի համար։ Ընկերությունը բնակելի համալիր է կառուցում Արաբկիրում։
Կոռուպցիայի կանխարգելման հանձնաժողով Փաշինյանի ներկայացրած գույքի և եկամուտների հայտարարագրից տեղեկանում ենք, որ նա 2024 թվականին 80․2 մլն դրամ եկամուտ է ունեցել, այդ թվում՝ 3 բանկերից 56․8 մլն դրամ վարկ է վերցրել․ «Ամերիաբանկից» Փաշինյանը ստացել է 44․4 մլն դրամ, «Հայէկոնոմբանկից»՝ 11․7 մլն դրամ, և «Ակբա բանկից»՝ 730 հազար դրամ վարկ։ 2024-ին վարչապետը ստացել է 17 մլն դրամ աշխատավարձ, 354 հազար դրամ «Հայէկոնոմբանկից» ավանդի դիմաց տոկոս, ևս 6 մլն դրամ Փաշինյանը նվիրատվություն է ստացել կնոջից՝ Աննա Հակոբյանից։
Նկատենք, որ Փաշինյանը ևս 1 վարկ ունի եվրոյով, որի մայր գումարի մնացորդը 2024-ի տարեվերջին եղել է 6364 եվրո։
Վարչապետն ունի 1 բանկային ավանդ, որի գումարը տարեսկզբին եղել է 3․4 մլն դրամ, իսկ տարեվերջին նվազել և դարձել է 726․9 հազար դրամ։ Նրա բանկային հաշիվներին 2024-ի տարեվերջին եղել է 1․27 դոլար և ընդհանուր մոտ 477 հազար դրամ, կանխիկ հայտարարագրել է 500 դոլար և 700 հազար դրամ։
Վարչապետն անցած տարի հանգստի նպատակով ծախսել է 5․2 մլն դրամ։
Նիկոլ Փաշինյանը «Անտառների վերականգնման և զարգացման հիմնադրամի», «Հայաստան» համահայկական հիմնադրամի, «Ներդրումների աջակցման կենտրոն» հիմնադրամի հոգաբարձուների խորհրդի նախագահն է, անդամակցում է «Խոսքի ազատության աջակցության հիմնադրամին», նաև 3 կազմակերպության հիմնադիր է՝ «Հիմա» ժողովրդավարության աջակցության, «Քաղաքացիական պայմանագիր» ժողովրդավարության աջակցության, «Քաղաքացիական պայմանագիր» վերադարձի հիմնադրամի։ Փաշինյանը «Քաղաքացիական պայմանագիր» կուսակցության վարչության նախագահ է։
Փաշինյանի կինը՝ Աննա Հակոբյանը, և չափահաս դուստրը՝ Մարիամ Փաշինյանը, հայտարարագրեր դեռ չեն ներկայացրել։ Հիշեցնենք, որ Աննա Հակոբյանին է պատկանում «Մեր տպարանը» ընկերության 50 % բաժնեմասը։
Գայանե Խաչատրյան
