Իսրայելական բանակը կրակել է Արևմտյան ափ այցելած օտարերկրյա դիվանագետների ուղղությամբ. ՏԵՍԱՆՅՈՒԹ

Իսրայելի զինվորականները չորեքշաբթի կրակ են բացել եվրոպացի և արաբ դիվանագետների մեծ պատվիրակության ուղղությամբ, որը պաշտոնական այցով գտնվում էր Արևմտյան ափին գտնվող Ջենինի փախստականների ճամբարում։ Միջադեպն արագ արձագանքի է արժանացել։

ԵՄ դիվանագիտության ղեկավար Կայա Կալլասը հայտարարել է՝ «անընդունելի» է, որ իսրայելական բանակը կրակ է բացել դիվանագիտական ​​​​պատվիրակության ուղղությամբ, որի կազմում եղել են նաև եվրոպացի պաշտոնյաներ։

«Դիվանագետների կյանքին ուղղված ցանկացած սպառնալիք անընդունելի է»,- մամուլի ասուլիսում ասել է Կալլասը՝ հավելելով, որ պատասխանատուները պետք է «պատասխանատվության ենթարկվեն»։

Իսրայելի ԱԳՆ-ն էլ հայտնել է, որ խումբն այցելել է պաղեստինյան Ջենին քաղաքում գտնվող փախստականների ճամբար, սակայն շեղվել է «հաստատված երթուղուց» և «մտել մի տարածք, որտեղ նրանց թույլատրված չէր գտնվել»։ Դրանից հետո իսրայելական զորքերը «զգուշացնող կրակոցներ» են արձակել։

«Իսրայելի պաշտպանության բանակը ցավում է պատճառված անհարմարության համար»,- հայտարարել են Իսրայելի բանակից՝ հավելելով, որ հետաքննություն կանցկացվի, և ներգրավված երկրները կտեղեկացվեն դրա արդյունքների մասին։

Այցը կազմակերպած Պաղեստինյան ինքնավարության տվյալներով՝ դիվանագետների թվում էին ԵՄ-ի, Ֆրանսիայի, Մեծ Բրիտանիայի, Իտալիայի, Կանադայի, Ռուսաստանի, Չինաստանի և այլ երկրների պատվիրակներ։

Պաղեստինի ինքնավարության արտաքին գործերի նախարարության խոսնակը քննադատել է միջադեպը՝ այն անվանելով «սարսափելի հանցագործություն, որը կատարվել է իսրայելական օկուպացիոն ուժերի կողմից, որոնք դիտավորյալ ​​կրակել են հավատարմագրված դիվանագիտական ​​​​պատվիրակության վրա»։

Իտալիայի արտաքին գործերի նախարար Անտոնիո Տայանին սոցիալական ցանցերում հայտարարել է, որ կանչել է Հռոմում Իսրայելի դեսպանին՝ «Ջենինում տեղի ունեցածի վերաբերյալ պաշտոնական պարզաբանումներ ստանալու համար»։

Միջադեպը տեղի է ունենում մեկ օր անց այն բանից, երբ Կալլասը հայտարարել էր, որ ԵՄ-ն կվերանայի Իսրայելի հետ իր քաղաքական և տնտեսական համաձայնագիրը՝ վերջինիս կողմից Գազայի հատվածում իրականացված ռազմական հարձակման և պաշարված անկլավում առաջացած հումանիտար աղետի համար։

Թարգմանությունը՝ Էմմա Չոբանյանի