21.12.2025 | 22:02
Ֆուտզալի Հայաստանի հավաքականը հաղթեց Մոլդովային
Գազայում իսրայելական հարվածներից գիշերը առնվազն 19 մարդ է զոհվել
Քաղաքականություն
21.05.2025 | 16:40
Գազայի քաղաքացիական պաշտպանության գործակալության տվյալներով՝ Իսրայելի կողմից գիշերն իրականացված հարվածների հետևանքով զոհվել է առնվազն 19 մարդ, այդ թվում՝ մեկ շաբաթական երեխա, գրում է France 24-ը։
«Մեր անձնակազմերը տեղափոխել են 19 զոհի, որոնց մեծ մասը երեխաներ են, և տասնյակ վիրավորների՝ Իսրայելի ռազմական ինքնաթիռների կողմից Գազայի հատվածի տարբեր շրջաններում երեկ գիշեր և այսօր առավոտյան իրականացված օդային հարվածների հետևանքով»,- AFP-ին ասել է քաղաքացիական պաշտպանության խոսնակ Մահմուդ Բասալը։
Զուգահեռաբար, եվրոպական երկրները մեծացնում են ճնշումը Իսրայելի վրա՝ դադարեցնելու ինտենսիվ արշավը Գազայում և թույլ տալու ավելի շատ օգնություն հասցնել պատերազմից ավերված տարածք։
Գազայում տիրող ծանր մարդասիրական իրավիճակը միջազգային բողոքի ալիք է բարձրացրել։ Եվրամիությունը երեքշաբթի արտաքին գործերի նախարարների հանդիպումից հետո հայտարարել է, որ վերանայելու է Իսրայելի հետ առևտրի և համագործակցության համաձայնագիրը՝ մարդու իրավունքների ենթադրյալ խախտումների պատճառով։ ԵՄ գլխավոր դիվանագետ Կայա Կալլասը հայտարարել է, որ 27 անդամ պետությունների «ճնշող մեծամասնությունը» կողմ է քվեարկել այդ քայլին՝ հավելելով, որ «երկրները տեսնում են, որ Գազայում իրավիճակն անընդունելի է և ցանկանում են ապաշրջափակել մարդասիրական օգնությունը»։
Շվեդիան էլ հայտարարել է, որ կճնշի ԵՄ-ին՝ պատժամիջոցներ կիրառել իսրայելցի նախարարների նկատմամբ։
«Քանի որ մենք չենք տեսնում Գազայի խաղաղ բնակիչների վիճակի հստակ բարելավում, մենք պետք է ավելի բարձրացնենք տոնը»,- ասել է երկրի արտաքին գործերի նախարար Մարիա Մալմեր Ստեներգարդը։
Մեծ Բրիտանիան կասեցրել է Իսրայելի հետ ազատ առևտրի բանակցությունները, կանչել Իսրայելի դեսպանին և հայտարարել պատժամիջոցների մասին։ Սրանք մինչ այժմ ամենախիստ միջոցներն են Իսրայելի պատերազմական ջանքերի դեմ։
«Օգնության արգելափակում, պատերազմի ընդլայնում, ընկերների և գործընկերների մտահոգությունների անտեսում։ Սա անհիմն է և պետք է դադարեցվի»,- խորհրդարանում ունեցած ելույթում ասել է Բրիտանիայի արտգործնախարար Դեյվիդ Լամմին։
Մեծ Բրիտանիայի քայլերին արձագանքելով՝ Իսրայելի արտաքին գործերի նախարարության խոսնակ Օրեն Մարմորշտեյնն ասել է․ «Արտաքին ճնշումը չի շեղի Իսրայելին իր գոյությունն ու անվտանգությունը պաշտպանելու ուղուց»։
Իսրայելը մերժել է նաև Եվրամիության որոշումը՝ վերանայելու դաշինքի հետ համագործակցության համաձայնագիրը։
Իսրայելի պաշտպանության նախարարության COGAT-ը, որը վերահսկում է պաղեստինյան տարածքներում քաղաքացիական գործերը, հայտարարել է, որ «մարդասիրական օգնություն տեղափոխող ՄԱԿ-ի 93 բեռնատար, այդ թվում՝ ալյուր, մանկական սնունդ, բժշկական սարքավորումներ և դեղագործական դեղամիջոցներ, երեքշաբթի տեղափոխվել են Գազա»։
ՄԱԿ-ի գլխավոր քարտուղար Անտոնիո Գուտերեշի խոսնակը հաստատել է, որ տասնյակ բեռնատարների մուտքը թույլատրվել է, սակայն խոսել է մատակարարումները ստանալու դժվարությունների մասին։ ՄԱԿ-ի մարդասիրական հարցերով պատասխանատու Թոմ Ֆլեթչերն ասել է, որ երկուշաբթի մուտք գործելու թույլտվություն ստացած ինը բեռնատարները «մի կաթիլ էին այն ամենի ծովում, ինչ անհրաժեշտ է անհապաղ»։ Նա BBC-ին ասել է, որ 14,000 նորածին կարող է մահանալ հաջորդ 48 ժամվա ընթացքում, եթե օգնությունը ժամանակին չհասնի նրանց։
Հիշեցնենք, որ Մեծ Բրիտանիայի, Կանադայի և Ֆրանսիայի առաջնորդներն էլ Իսրայելին սպառնացել էին պատժամիջոցներով, եթե Թել Ավիվը չդադարեցնի Գազայի դեմ վերսկսված ռազմական հարձակումը և չվերացնի օգնության սահմանափակումները։
Թարգմանությունը՝ Էմմա Չոբանյանի
